गरियाबंद । गरियाबंद म किसान मन फसल बीमा रासि म गड़बड़ी के आरोप लगाइन हे। आप मन ल बता दन कि मैनपुर म सैंकड़ों किसान मन सोमवार के किसान संघर्स समिति के बैनर तले इक्कठा होके एक दिवसीय धरना दिन, संग ही रइली निकाल के कलेक्टर के नाव म तहसीलदार ल ज्ञापन सउपिस। उहें किसान मन के आरोप हे, कि पटवारी मन फसल के सही मूल्यांकन नइ करिन। जेकर बर किसान मन अधिकारी मन ल तत्काल हटवाए के मांग करत हुए फसल बीमा के रासि ल तुरंते जारी करे के मांग करे हे।
स्कूल, आंगनबाड़ी, उप स्वास्थ्य केंद्र म सिकलसेल टेस्ट आज
स्वास्थ्य बिभाग के तरफ ले 21 मार्च के स्कूल, आंगनबाड़ी, उप स्वास्थ्य केंद्र म सिकलसेल टेस्ट करे जात हे। एमा एक लक्ष्य तय करे गे हे। जेमा पांच लाख गर्भवती महिला अऊ लइका मन के संग वर्ल्ड रिकॉर्ड बनाए के तयारी करे गिस, ताकी वर्ल्ड रिकाड बन जाए। फेर वर्ल्ड रिकॉर्ड ल लेके स्वास्थ्य मंत्री अजय चंद्राकर ल ही जानकारी नइ हे। जब मीडिया ह ओकर ले भेंट करके सवाल पूछिस तब मंत्री चंद्राकर ल कुछु पता नइ रिहिस। चंद्राकर ह कहिन कि वर्ल्ड रिकाड बनत हे तो बनत होही, एकर उपर मैं का कहव? विभाग ह सिकलसेल दिवस मनात हे, आप मन बतावव का कहिना चाही।
राजिम बिधानसभा सीट म बाहरी के मुद्दा गरमाइस
गरियाबंद जिला के राजिम बिधानसभा सीट ये चुनई म सबले बड़े चुनौती होही। आप मन ल बता दन कि बाहरी प्रत्यासी के मुद्दा कांग्रेस उपर ये दरि घलो भारी पड़ सकत हे। कांग्रेस पाछु दरि घलो बाहरी के मुद्दा के कारन ही अपन ये परंपरागत सीट ले हाथ धो बइठे रिहिस। कायास लगाए जात हे कि, पार्टी ह ये दरि घलो बाहरी प्रत्यासी ल टिकट दिस त बाहरी के मुद्दा फेर हावी हो सकत हे। उहें जोगी के पार्टी ह घलो राजिम बिधानसभा ले जीत के दावा करत हे, फेर न तो अब तक पार्टी ल चुनई चिन्ह आबंटित होए हे, अऊ ना ही संगठन ठीक ले तयार हो पाए हे। तीन्नों पार्टी के नेता घलोक अवइया ये चुनौती ले जानथे।
आँख-कान म पट्टी बांधके प्रदर्सन करिस आंगनबाडी कार्यकर्ता मन
राजनांदगांव म प्रसासन ह प्रदरसन करत 132 आगंनबाड़ी कार्यकर्ता अऊ सहायिका मन ल सेवा समाप्ति के आदेस दे दिस। एकर बाद घलो कार्यकर्ता मन हरताल म बइठे हे। पहिली घलो आंगनबाडी कार्यकर्ता मन प्रसासन के नोटिस ल जलाके अऊ आँख-कान म पट्टी बांधके प्रदर्सन करत रिहिन। आप मन ल बता दन कि राजनांदगांव सहित पूरा प्रदेस भर म अपन छह सूत्रीय मांग ल लेके आगंनबाड़ी कार्यकर्ता अऊ सहायिका मन के प्रदर्सन अभू घलोक जारी हे।
निधि मामला म बिदेश मंत्री सुषमा ह सांसद ल लिखिस पत्र
बिलासपुर के बेटी निधि ल वापस भारत लाए के संबंध म बिदेस मंत्रालय ह जानकारी लिस हे। बिदेस मंत्री सुषमा स्वराज ह बिलासपुर लोकसभा क्षेत्र के सांसद लखनलाल साहू ल पत्र लिखके बताइस कि न्यूयॉर्क के भारतीय उच्चायुक्त कार्यालय ह निधि के संपर्क म हे। ओला उचित मार्गदर्सन, सहायता के संग पंजीकृत लॉ फर्म के माध्यम ले कानूनी सलाह दे जात हे।
No Comment! Be the first one.