जल संसाधन विभाग ल राष्ट्रीय पुरस्कार

विश्व जल दिवस म नई दिल्ली म मिलही पुरस्कार
रायपुर । राज्य सरकार के जल संसाधन विभाग ल राष्ट्रीय पुरस्कार बर चुने गेहे। ये पुरस्कार वर्ष 2017-18 बर वाटर डाईजेस्ट एवार्ड के रूप म ये महीना के 21 तारीख के विश्व जल दिवस के अवसर म नई दिल्ली म आयोजित समारोह म दे जाही। जल संसाधन विभाग के सचिव ह ये जानकारी दीस।
जल संसाधन के क्षेत्र म बेस्ट कम्युनिटी प्रोजेक्ट ऑफ द ईयर के ये अवार्ड केंद्रीय जल संसाधन ,संसदीय कार्य,नदी विकास मंत्री अर्जुन राम मेघावल प्रदान करही। अवार्ड समारोह के आयोजन 21मार्च के होटल जेपी वसंत कांटिनेंटल ,वसंत विहार नई दिल्ली म करे गेहे। ये अवार्ड जल संसाधन विभाग भारत सरकार,यूनेस्को,केंद्रीय भू जल बोर्ड,केंद्रीय जल आयोग अउ गंगा स्वच्छता मिशन के सहयोग ले वाटर डाइजेस्ट संस्था ह प्रदान करथे। राज्य निर्माण के बाद विगत 17 बरस म ये पहिली अवसर हवय, जब छत्तीसगढ़ सरकार के जल संसाधन विभाग ल राष्ट्रीय पुरस्कार से नवाजे जात हे। ये उपलब्धि बर मुख्यमंत्री डॉ. रमन सिंह ह जल संसाधन मंत्री बृजमोहन अग्रवाल, जल संसाधन विभाग के सचिव सोनमणि बोरा अउ उँखर पूरा टीम ल बधाई दीस हे। विभाग के मंत्री बृजमोहन अग्रवाल घलो खुशी जताईस हे अउ अपन विभाग के अधिकारी अउ कर्मचारी मन समेत प्रदेशवासी मन ल बधाई दीस हे।