ताजा समाचार

नम आंख ले शहीद मन ल दे गिस श्रद्धांजलि

पार्थिव शरीर गृहग्राम बर रवाना होइस

रायपुर। सुकमा जिला के किस्टाराम म शहीद जवान मन ल रायपुर के माना सीआरपीएफ कैंप म श्रद्धांजलि दे गिस। केंद्रीय गृह राज्यमंत्री हंसराज अहीर अउ मुख्यमंत्री रमन सिंह ह जवान मन ल श्रद्धांजलि दीस। शहीद जवान मन के पार्थिव शरीर ल उंखर गृहग्राम भेज गिस हे। मुख्यमंत्री रमन सिंह ह ट्वीट करिस कि ‘आज केन्द्रीय गृहराज्य मंत्री के संग हमार सीआरपीएफ के शहीद जवान मन के अंतिम दर्शन करेव। छत्तीसगढ़ के सुरक्षा करत हुए अपन प्राण के आहुति देवइया ये जवान मन ल मैं श्रद्धासुमन अर्पित करत हव।’
सुकमा हमला म शहीद हुए सीआरपीएफ के 9 जवान मन ल बुधवार सुबह 6 बजे रायपुर के माना स्थित सीएएफ के चौथी बटालियन म श्रद्धांजलि दे गिस । ये दउरान मुख्यमंत्री डॉ. रमन सिंह, केन्द्रीय गृह राज्य मंत्री हंसराज अहीर, सीआरपीएफ डीजी आरआर भटनागर समेत पुलिस अउ सीआरपीएफ के बड़े अधिकारी मन माना पहुंच के शहीद जवान मन ल श्रद्धांजलि दीस। एखर बाद जवान मन के पार्थिव शरीर ल उँखर गृहग्राम बर रवाना कर दे गिस। बता दन कि बुधवार सुबह साढ़े 5 बजे शहीद जवान मन के शव माना बटालियन म पहुंचिस ।
आप मन ल जानकारी हो कि मंगलवार नक्सली मन ह आईईडी ब्लास्ट कर एंटी लैंडमाइन वाहन ल उड़ा दिस। ये हमला म केंद्रीय रिजर्व पुलिस बल (सीआरपीएफ) के 9 जवान शहीद होगे अउ 2 अन्य घायल हो गिस। घायल जवान मन ल इलाज बर हेलीकॉप्टर ले रायपुर लाे गिस,जिहां उँखर इलाज जारी हवय मुख्यमंत्री रमन सिंह खुद अस्पताल पहुंचके घायल जवान मन ले मुलाकात करिस अउ उंखर हालाचाल पूछिस।
सुकमा नक्सली हमला म शहीद हुए जवान मन के प्रति राष्ट्रपति रामनाथ कोविंद, प्रधानमंत्री नरेंद्र मोदी, मुख्यमंत्री रमन सिंह, केंद्रीय गृहमंत्री राजनाथ सिंह समेत तमाम नेता मन ह शोक जताइस हे। पीएम ह कहिस कि ये दुख के घड़ी म शहीद के परिवार के संग पूरा देश हवय। एती सीएम रमन सिंह ह ये ल नक्सली मन के कायराना करतूत बताइस हे।

Related Articles

Leave a Reply

Your email address will not be published. Required fields are marked *

Close