ताजा समाचार

पखांजूर क्षेत्र म बिभिन्न जगह ले अवैध कब्जा हटइस

जेन मन शिकायत करिस उहीं मन करे रिहिस हे सरकारी जमीन उपर कब्ज़ा

रायपुर। कांकेर जिला के पखांजूर क्षेत्र म एसडीएम अऊ तहसीलदार के टीम ह बिभिन्न जगह ले अवैध कब्जा हटवाइस। असल म इहां प्रधानमंत्री आवास योजना के तहत कई परिवार ल आवास मिले रिहिस। फेर ग्रामीन मन के बिरोध के चलत आवास ल तोड़ दे गे हे। उहीं ग्रामीन मन सरकारी जमीन उपर कब्ज़ा घलो कर लिन जेकर सिकायत पीड़ित मन करिन। सिकायत के उपर राजस्व बिभाग के टीम ह मउका म पहुंचके अतिक्रमन हटाए के कार्रवाई करिस।
काशीराम नगर के नवा फ्लाइओवर के उदघाटन होइस
48 करोड़ रूपिया के लागत ले बने काशीराम नगर के नवा फ्लाइओवर के उदघाटन शुक्रवार के करे गिस। मुख्यमंत्री डॉ।रमन सिहं ये फ्लाइओवर के उद्दघाटन करिस। स्मार्ट सिटी म राजधानी रायपुर के नाव आए के बाद एल्यूमिनियम एंगल ले बने ये ह पहिला फ्लाईओवर हे, जेकर सुंदरता उपर खासा ध्यान दे गे हे। एमें गार्डन, लाइटिंग, के उपर बिसेस खर्चा करे गे हे। केनाल रोड ले लालपुर ल जोड़इया ये फ्लाइओवर आवागमन बर बहुंत सुविधाजनक रही।
प्रधानमंत्री आवास योजना के भूमिपूजन करिस मुख्यमंत्री ह
रायपुर बिकास प्राधिकरन के ड्रीम प्रोजेक्ट कमल विहार योजना म मुख्यमंत्री डॉ. रमन सिंह प्रधानमंत्री आवास योजना के भूमिपूजन करिस एकर ले पहिली मुख्यमंत्री ह बीते बछर 5 मार्च के प्राधिकरन के इन्द्रप्रस्थ रायपुरा म प्रधानमंत्री आवास योजना के तहत EWS अऊ LIG फ्लैट्स के भूमिपूजन करे रिहिस। जेकर निर्मान तेज गति ले चलत हे। प्राधिकरन के मुख्य कार्यपालन अधिकारी एम।डी। कावरे ह बताइस कि योजना म कुल 2,048 फ्लैट बनाए जाही, एमें 5 लाख के लागत के 2BHK वाला 768 EWS फ्लैट्स, 8 लाख के लागत के 2BHK वाला 768 LIG फ्लैट्स अऊ 10।5 लाख के लागत वाला 3BHK 512 LIG फ्लैट्स के निर्मान करे जाही। कार्यक्रम स्थल म EWS फ्लैट्स बर लॉटरी घलो निकाले जाही। संग ही होम लोन बर बैंक, अऊ बित्तदायी संस्था के अधिकारी मन घलो मउजूद रिइही।
बिधायक डॉ. खिलावन साहू के नेतृत्व म ‘आशीर्वाद यात्रा’ निकलिस
जांजगीर-चाम्पा के सक्ती बिधानसभा क्षेत्र म बिधायक डॉ. खिलावन साहू के नेतृत्व म ‘आशीर्वाद यात्रा’ निकाले जात हे। 11 मार्च ले सुरू होए यात्रा के बाद अभु तक 30 ले ज्यादा गांव म बीजेपी कार्यकर्ता पहुंचिन हें। अऊ लोगन मन ल बीजेपी सरकार के बिकास कार्य ले अवगत करात हे। लोगन मन ल बिकास कार्य सम्बन्धी पाम्पलेट देके बताए जात हे कि छत्तीसगढ़ अऊ सक्ती बिधानसभा क्षेत्र म बीते 13 बछर म बिकास के गति तेजी ले बढ़े हे। आशीर्वाद यात्रा ल लेके सक्ती बिधायक डॉ। खिलावन साहू ह कहिस कि प्रदेश म बीजेपी सरकार ह चौतरफा बिकास करे हे। अऊ ये बात ल जनता घलो समझत हें।

Related Articles

Leave a Reply

Your email address will not be published. Required fields are marked *

Close