माहुलकोट पंचायत ह खाली कागज म ही ODF घोसित…..संगे-संग पढ़व दूसर खबर

गरियाबंद । जिला के माहुलकोट पंचायत ह कुछ महीना पहिली ही ODF घोसित होए हे। फेर हकीकत कछु अऊ ही हे। असल म पंचायत म 400 सउचालय बनाए बर रिहिस, सरकारी आकड़ा के अनुसार सउचालय के निर्मान पूरा हो गे हे। फेर गांव के लोगन मन आज घलो खुला म सउच बर जाथे। पंचायत ल खाली कागज म ही ODF घोसित करे गे हे। ज्यादातर सउचालय पूर्न रूप ले तइयार नइ हे। कउनो म दरवाजा नइ हे त कउनो म छत। जोन ह बने हे ओकर घलो उपयोग लोगन मन घरेलू समान रखे बर करत हे। मामला म एसडीएम ह जांच के बाद कार्रवाई के बात कहे हे।

अम्बिकापुर म पानी के किल्लत ले लोगन मन ल राहत
अम्बिकापुर म पानी के किल्लत ले लोगन मन ल राहत दे बर नगर निगम ह पहल करे हे। असल म इहां लगे नवा फिल्टर प्लांट ल सुरु होए म बेरा हे, जेकर कारन ले जुन्ना फिल्टर प्लांट म नवा पम्प लगाके लोगन मन ल पानी के पूर्ती करे के प्रयास करे जात हे। आप मन ल बता दन कि फिल्टर प्लांट ले30 लाख लीटर ले ज्यादा पानी के सप्लाई के बेवस्था बनाए जात हे। उहें वर्तमान म इहां ले रोज एक करोड़ 40 लाख लीटर पानी के सप्लाई होत हे, जेकर ले लोगन मन ल पानी के समस्या ले राहत मिलत हे।

डगनिया म रहइया बैगा आदिवासी मन ल मुलभुत सुविधा ले वंचित
मुंगेली के आश्रित ग्राम डगनिया म रहइया बैगा आदिवासी मन ल मुलभुत सुविधा ले वंचित होए बर पड़त हे। लगभग 30 ले35 बैगा परिवार के रहइया ये ईलाका म 5 हैण्डपम्प लगवाए गे हे जेमें 3 हैण्डपम्प खराब हो चुके हे। उहें दू हैण्डपम्प चालू हे ओकर ले लाल पानी निकलत हे। लोगन मन बताइन कि साफ पानी बर ओमन ल 3 किलोमीटर दूरिहा जाए बर पड़थे। संग ही ओमन ये मामला के सिकायत सरपंच ल लेके अधिकारी मन तक कर डारे हे। उहें बन बिभाग के सचिव आर पी मंडल ह समस्या सुनके निराकरन के आस्वासन रिहिस फेर अभु तक कउनो कार्रवाई नइ हो पाए हे।