ताजा समाचार

मुख्यमंत्री ल कटहल अउ मुनगा भेंट करिस सुखसागर राम ह

किसान ल अपन शुभकामना दीस डॉ रमन सिंह ह

रायपुर। मुख्यमंत्री डॉ रमन सिंह ल सोमवार के सरगुजा जिला के ग्राम ससौली (विकासखण्ड-लुण्ड्रा) के समाधान शिविर के अगला पड़ाव बर रवाना होए के पहिली उहां के एक किसान सुखसागर राम ह पांच ताजा कटहल भेंट करिस। उमन मुख्यमंत्री ल हेलीकॉप्टर तीर पहुंचके कटहल के संग मुनगा घलोक भेंट करिन। सहज-सरल स्वभाव के किसान के ए आत्मीयता ले मुख्यमंत्री अड़बड़ प्रभावित होइन। आप मन जानतेच होहू के छत्तीसगढ़ के सरगुजा अऊ जशपुर के पहाड़ी इलाका मन म कटहल के भरपूर पैदावार होथे। ससौली के किसान सुखसागर राम ह मुख्यमंत्री ल बताइस कि उंखर बाड़ी म कटहल के दू पेड़ हे। एखर अलावा तीन एकड़ खेत घलोक हे, जऊन म ओ ह धान, गन्ना अऊ गेहूं के खेती करथे। सुखसागर ह डॉ. सिंह ल ये घलोक बताइस कि राज्य सरकार ह ओ मन ल ग्राम ससौली म ’किसान मित्र’ के रूप म कृषि विभाग के योजना मन के प्रचार-प्रसार के घलोक जिम्मेदारी देहे हे। डॉ. सिंह ह ए मा खुशी जताइन अऊ किसान संगी ल अपन शुभकामना दीस।

Related Articles

Leave a Reply

Your email address will not be published. Required fields are marked *

Close