रमन ह पूछिस पहिली के लइका ले 16 के पहाड़ा

कोरिया। मुख्यमंत्री डॉ. रमन सिंह ह लोक सुराज अभियान म गुरुवार के ग्राम पंचायत मुख्यालय मेरो पहुंचिस । डॉ.सिंह ह उहां के स्कूली लइका मन ले मुलाकात करिस। सीएम स्कूल म अध्ययनरत लइका मन के पालक मन ले घलो बातचीत करिस। मेरो म सीएम ह प्राथमिक स्कूल के पहिली कक्षा के छात्र विशाल ले 16 के पहाड़ा सुनाए बर कहिस तव विशाल ह फटाक ले पहाड़ा सुना दिस। एखर ले प्रसन्न मुख्यमंत्री ह लइका के उत्साह बढ़ाए अउ शाबासी स्वरुप ओला अपन पेन भेंट करिस।
डॉ. सिंह ह ग्राम मेरो के चौपाल म उहां के सरकारी प्राथमिक स्कूल के नवा भवन निर्माण बर छह लाख रूपिया अउ हाईस्कूल म टेबल-कुर्सी आदि फर्नीचर बर दो लाख रूपिया के संग पास के टिपका पानी नाला म पुलिया निर्माण के स्वीकृति तुरंत प्रदान करिस हे। चौपाल म ग्रामीण मन ले चर्चा के दउरान मुख्यमंत्री ह उहां पड़ोस के कोरबा जिला ले दो पीढ़ी पहिली आके रहइया जयराम गोंड के सुपुत्री कुमारी सुनीता के जाति प्रमाण पत्र जारी करे बर अधिकारी मन निर्देश दिस। मुख्यमंत्री ह चौपाल म विभिन्न सरकारी योजना मन के प्रगति के घलो समीक्षा करिस। ग्राम पंचायत मेरो म 106 परिवार मन ल प्रधानमंत्री आवास योजना के तहत मकान निर्माण बर राशि मंजूर करिस हे। एमा 91 मकान के निर्माण पूरा होगे हे। ये दउरान सरकारी हाईस्कूल के 9वीं कक्षा के रामवती, सोनकुंवर, लीलावती, राजकुमारी समेत बालिका मन ह सरस्वती सायकल योजना के तहत सरकार डहर ले सायकल देय बर मुख्यमंत्री ल धन्यवाद दिस हे। डॉ. सिंह ह बालिका मन ल शुभकामनाएं दीस। उल्लेखनीय हवय कि राज्य म सरस्वती सायकल योजना के तहत स्कूल शिक्षा विभाग ह विगत 14 वर्ष म एक लाख 82 हजार बालिका मन ल निःशुल्क साइकिल हे हवय। एखर ले प्रदेश के हाईस्कूल मन म दर्ज संख्या 65 प्रतिशत से बढ़कर 101 प्रतिशत हो गेहे।