ताजा समाचारब्रेकिंग न्यूज

लिंगानुपात के मामला म छत्तीसगढ़ दूसर नम्बर म

नौ सफलतम राज्य मन (एचिवर्स स्टेट्स) के सूची म प्रदेश ह पहिली नम्बर म

रायपुर । नीति आयोग के ताजा रिपोट के अनुसार बालक-बालिका जन्म के समय लिंगानुपात के मामला म केरल के बाद छत्तीसगढ़ दूसर नम्बर म हे। स्वास्थ्य विभाग के अधिकारी मन ह बताइन कि नीति आयोग के रिपोट के अनुसार साल 2005-06 म राष्ट्रीय परिवार स्वास्थ्य सर्वेक्षण-3 म छत्तीसगढ़ राज्य म शिशु मन के जनम के समय बालक-बालिका लिंगानुपात प्रति 1000 बालक मन म 972 रहिस, जऊन साल 2015-16 के राष्ट्रीय परिवार स्वास्थ्य सर्वेक्षण-4 के मुताबिक बाढ़ के प्रति 1000 बालक मन म बालिका मन के संख्या 977 हो गे हे।
स्वास्थ्य विभाग के अधिकारी मन ह कहिन कि आयोग के रिपोट के मुताबिक एकर पहिली ये लिंगानुपात साल 2011-2013 के स्थिति म छत्तीसगढ़ म 961 दर्ज करे गे रहिस, जबकि केरल म ये 967 दर्ज होए रहिस। ए प्रकार लिंगानुपात के मामला म छत्तीसगढ़ राज्य घलो राष्ट्रीय स्तर म काफी बेहतर स्थिति म हे। रिपोट म पूरा स्वास्थ्य सूचकांक मन के आधार म छत्तीसगढ़ ल देश के नौ सफलतम राज्य मन (एचिवर्स स्टेट्स) के सूची म पहिली नम्बर म सामिल करे गे हे। आन राज्य मन म गुजरात, हिमाचल प्रदेश, महाराष्ट्र, जम्मू-कश्मीर, आंध्रप्रदेश, कर्नाटक, पश्चिम बंगाल अऊ तेलांगना सामिल हे। एकर अलावा केरल, पंजाब अऊ तमिलनाडु ल अग्रिम लकीर के राज्य मन के श्रेणी म रखे गे हे।

Related Articles

Leave a Reply

Your email address will not be published. Required fields are marked *

Close