अविस्वास प्रस्ताव म चर्चा सुरू : विपक्षी विधायक सरकार उपर प्रहार

रायपुर। छत्तीसगढ़ विधानसभा म आज विपक्ष के लाय गे अविस्वास प्रस्ताव म चर्चा सुरू होगे हे। विपक्षी विधायक सरकार उपर प्रहार करत हे। अविश्वास प्रस्ताव म चर्चा कल बिहनिया तक चले के संभावना हे। चर्चा के बाद सदन के विधायक मन ल अविश्वास प्रस्ताव म मतदान कराय जाही। सदन के गणित के हिसाब ले भाजपा के जीत तय हे।
कांग्रेस ले धनेंद्र साहू ह कमान संभालत हुए चर्चा के शुरुआत करिन। उमन ह कहिन के जब ले जनता के विस्वास सरकार ले टूटत जात हे, तब ले जनता के भावना मन ल ध्यान म रख के विपक्ष होय के नाता म हमन सरकार उपर अविस्वास जतात हवन।
साहू ह सरकार ल घमंड ले भरे अउ दंभी बतात हुए कहिन के हमन सरकार के गैरत ल जगाय बर खड़े हवन। अभु घलो अपन गलती मन ल सुधार सकत हे। आज बस्तर ले सरगुजा तक चारों डहर जनता कुसासन ले त्रस्त हे। हाहाकार मचे हे।
अविश्वास प्रस्ताव के चर्चा म सरकार के डहर ले प्रेम प्रकाश पांडेय ह पक्ष रखत हुए कहिन के कोन बात ले अविस्वास प्रस्ताव लाय गेहे ये समझ म नइ आवत हे। लाखों लोगन के घर मन म बिजली पहुंचाय, चरणपादुका देय बर, उज्ज्वला योजना म गैस चूल्हा दे बर या फेर बोनस देया ग गिस, येकरसेती लाय गे का ? हमन ह जे वादा करे हन तेली पूरा करे हन। ये दउरान सत्ता पक्ष अउ विपक्ष के बीच म आरोप-प्रत्यारोप लगाय जाय लगिस। येकर ले सदन म हंगामा होय लगिस।