ताजा समाचार

नवा छत्तीसगढ़ साल 2022 म नवा भारत के मार्ग प्रशस्त करही

डॉ. रमन सिंह ल यशस्वी अऊ लोकप्रिय मुख्यमंत्री बताइस मोदी ह

रायपुर । प्रधानमंत्री नरेन्द्र मोदी ह छत्तीसगढ़ म तेजी ले होवत विकास बर आज मुख्यमंत्री डॉ. रमन सिंह के तारीफ करत कहिन के जउन राज्य के निर्मान के पीछू तत्कालीन प्रधानमंत्री अटल बिहारी वाजपेयी के विजन हे, राज्य के मनखे मन के कठोर परिश्रम हे, ओ राज्य ल तेज गति ले आगू बढ़त देखना एक सुखद अनुभव हे। श्री मोदी ह कहिन कि अटल जी के विजन ल मोर मितान रमन सिंह पूरा मेहनत के संग आगू बढ़ावत हे। हर पइत वो कोनो नवा कल्पना अऊ नवा योजना, नवा उत्साह अऊ उमंग के संग मोर तीर लेके आथें अऊ ओला लागू करके सफलता के शिखर तक पहुंचाथें। उमन डॉ. रमन सिंह ल यशस्वी अऊ लोकप्रिय मुख्यमंत्री बताइस। श्री मोदी ह बस्तर संभाग के मुख्यालय जगदलपुर ल आज घरेलू विमान सेवा ले जोड़े जाय के उल्लेख करत कहिन -कई बछर पहिली बस्तर के पहिचान सिरिफ बम, बंदूक अऊ पिस्तौल के नाम म होत रहिस, फेर आज जगदलपुर के पहिचान हवाई अड्डा ले घलोक होए लगे हे।
श्री मोदी ह कहिन -कहूं विकास करना हे, प्रगति करना हे, तो सांति अऊ कानून व्यवस्था घलोक बहुत जरूरी हे। डॉ. रमन सिंह ह एक तरफ सांति अऊ स्थिरता कायम करे म बल देहे हें, उन्‍हें दूसर तरफ उमन छत्तीसगढ़ ल आगू बढ़ाए बर नवा कल्पना मन के संग विकास यात्रा के घलोक आयोजन करे हें। श्री मोदी ह छत्तीसगढ़ म केन्द्र अऊ राज्य के कई ठन योजना मन अऊ उपलब्धि मन के उल्लेख करत कहिन कि- नवा छत्तीसगढ़ साल 2022 म नवा भारत के मार्ग प्रशस्त करही। उमन आमसभा म छत्तीसगढ़ के जनता के संग कई बरिस जुन्ना संबंध ल सुरता करत कहिन -ये क्षेत्र मोर बर नवा नो हे। छत्तीसगढ़ जब मध्यप्रदेश के हिस्सा रहिस, तब मैं इहां टू-व्हीलर म घलोक आवत रहेंव। तब ले अब तक छत्तीसगढ़ ले मोर कोनो दूरी नइ हे। कहूं पाछू 25 बछर म एको साल अइसे नइ गीस, जब मोर इहां आना नइ होउ होवय। इहां के कोनो जिला अइसन नइ हे, जिहां मैं नइ गए होंवव। श्री मोदी ह आमसभा म मवजूद विशाल जनसमूह के माध्यम ले छत्तीसगढ़ के ढाई करोड़ जनता ल अपन सुभकामना दीन। उमन कहिन -आज ले दू महीना पहिली घलोक मैं छत्तीसगढ़ आए रहेंव, वो तको 14 तारीक रहिस अऊ आज घलोक 14 तारीक हे। मोला दुबारा इहां के जनता के आसीर्वाद मिले हे।

Related Articles

Leave a Reply

Your email address will not be published. Required fields are marked *

Close