ताजा समाचार

हमर जिला अस्पताल ल बचा लेवव साहेब

इलाज बर दूसर अस्पताल म भेजे जाथे इहां के मरीज मन ल

मुंगेली । हमर जिला अस्पताल ल बचा लेवव साहेब, ये गोहर हमर विधायक अउ प्रदेश सरकार के मंत्री ह अउ जन प्रतिनिधि ले जनता ह करत हे । काबर के सुविधा के अभाव म 100 बिस्तर जिला हास्पिटल ह रेफर सेंटर बनको रहिगे। डॉक्टर मन ह इलाज के नाम म खानापूर्ति करच हवय।
मुंगेली जिलावासी के दुःख ल अनदेखी करत हमर जिला के बड़े साहब मन के बारे म जतना कहव कम हे । हमर जिला अस्पताल जेन हर अपन मरीज ल दूसर अस्पताल भेजे के जगा बन के रही गे हे। इहां के लापरवाही के बारे का कहे जाय। आज येकर एक नमूना देखे बर मिलिस, जब मुंगेली-रायपुर रद्दा म एक वाहन ले टक्करय घायल एक झन मनखे ल जिला अस्पताल म लाये गिस। जिहां डॉक्टर मन के अनदेखी के कारण ओला अपन जान गवाय बर पड़िस । ये बात ले गुस्साय ओखर परिजन मन ह मुंगेली- रायपुर रोड़ म चक्काजाम कर दिस।अउ दोसी मन ला सजा देवाय के मांग करे लगिन । एसडीएम, तहसीलदार अउ पुलिस के अधिकारी के समझाय के बाद परिजन मन ह शांत होइन । तुरंते च सहायता रासि के रूप म मृतक के परिजन ल 25 हजार रुपिया देय गिस। अउ दोसी मन उपर कार्यवाही के बात कहे गिस हे ।
एखर पहिली घलो लापरवाही के एक मामला आय रिहिस । अभु कुछु दिन पहिली अस्पताल म जहरीला सांप तक ह घुस आय रिहिस हे । जेखर कारण जिला के कलेक्टर साहेब ह अस्पताल के दउरा म आय ल लगिस हे ।

Related Articles

Leave a Reply

Your email address will not be published. Required fields are marked *

Close