ये मामला म भाजपा ह कांग्रेस ले आघू रहिस….. महिला मन के उम्मीदवारी पाछू के सबो चुनाव मन ले जादा हे

रायपुर । छत्तीसगढ़ म सरकार चुने बर मतदाता मन ह उम्मीदवार मन के भाग्य के फइसला कर लिस हे। ये चुनाई ह कतको मायनों म खास रहिस हे। एक अहम बात ये रहिस के ए चुनाव म महिला मन के उम्मीदवारी पाछू के सबो चुनाव मन ले अधिक रहिस हे।

बछर 2000 म अस्तित्व म आए छत्तीसगढ़ म पहिली विधानसभा के चुनाई  2003 म होइस।  ए चुनाइ म राज्य के 90 म ले  46 सीट मन म 62 महिला चुनावी मइदान म उतरींन। 2008 म चुनाव लड़इया महिला मन के संख्या बढ़के 94 हो गिस।  बीते 2013 म थोड़कन कमी आईस अउ आंकड़ा 83 तक पहुंच गे। ए दफा फेर 115 महिला मन ह  चुनाव लड़त हे।

ये बेर कांग्रेस ले आघू निकलिस भाजपा….अब तक के तीन चुनाव म महिला मन के टिकट देय म कांग्रेस, भाजपा ले आघू रिहिस हे। लेकिन ये बेर भाजपा ह 14 महिला मन ल टिकट दिस। एखर विपरीत कांग्रेस ह केवल 12 ल प्रत्यासी बनाइस हे।  बसपा के कोटे ले पांच अउ जनता कांग्रेस छत्तीसगढ़ ले तीन महिला प्रत्यासी मइदान म हे। आम आदमी पार्टी  ह घलोक आठ महिला मन ल टिकट दिस हे।

महिला मन होइस जादा जागरूक……छत्तीसगढ़ के आधी आबादी मतदान के मामला म पुरुष मन ले जादा जागरूक हे। 20 नवंबर के राज्य के 72 सीट मन म होए मतदान म करीब 27 सीट मन म  महिला मन ह  पुरुष मन ले अधिक मतदान करिन हे। उहें , करीब दरजनभर ले जादा सीट मन अइसे हे , जिहां पुरुष अउ महिला मन के वोटिंग फीसदी म मामूली अंतर हे।