Home ताजा समाचार भिलाई स्टील प्लांट म इंजीनियर के संदिग्ध परिस्थिति म मउत….संगे संग पढव...

भिलाई स्टील प्लांट म इंजीनियर के संदिग्ध परिस्थिति म मउत….संगे संग पढव अउ दूसर खबर

25
0

भिलाई। एशिया के सबले बड़े स्टील प्लांट के कारखाना भिलाई स्टील प्लांट म कर्मचारी मन के मउत के सिलसिला थमे के नाव नइ लेवत हे। ताजा मामला म मेकेनली भारत इंजीनियरिंग कंपनी के इंस्ट्रूमेंट इंजीनियर अभिषेक राय के संदिग्ध परिस्थिति म मउत होगे।
मृतक अभिषेक प्लांट के गैस एनालाइजर रूम म अचेत हालात म जमीन म पड़े हुए मिलिस हे। आशंका जताए जात हे कि इंजीनियर के मउत जहरीली गैस के संपर्क म आए ले होइस हे। फिलहाल भट्टी थाना पुलिस मृतक के पंचनामा करके जांच म जुट गेहे। दरअसल भिलाई स्टील प्लांट के विस्तारीकरण परियोजना के अंतरगत कोल केमिकल विभाग – 3 म काम करइया मेकेनली भारत इंजीनियरिंग कंपनी के इंस्टूमेंट इंजीनियर अभिषेक राय ल गैस एनालाइजर रूम म बेहोशी के हालत म पाए गिस । ओला तुरंतचे मेन मेडिकल पोस्ट लाए गिस जिहां डॉक्टर मन ह ओला मृत घोषित कर दिस । मृतक अभिषेक मूलत: दुर्गापुर निवासी अउ भिलाई म चौहान टाउन म रहत रिहिस हे।

दुर्ग विवि के कुलपति बने सराफ
रायपुर। दुर्ग विश्वविद्यालय के नवा कुलपति शैलेन्द्र सराफ होंही। एखर आदेश बुधवार के राजभवन ले जारी होइस हे। जेमा प्रोफेसर सराफ के नाव म राज्यपाल बलरामजी दास टंडन ह मुहर लगा दीस हे। प्रोफेसर सराफ के नाव पहिली ले रविशंकर विवि के कुलपति बर चलत रिहिस हे। प्रोफेसर सराफ फार्मेसी काउंसिल ऑफ इंडिया के सदस्य घलो हवय। एखर संग ही रविशंकर विवि म फेकल्टी ऑफ टेक्नालॉजी के डीन घलो हे। प्रोफेसर सराफ ल कई अवार्ड मन ले सम्मानित करे जा चुके हे। जेमा सीनियर रिसर्च फैलोशिप ऑफ एम.पी.यू.जी.सी. , सीनियर रिसर्च फैलोशिप ऑफ सीएसआईआर न्यू दिल्ली अउ रिसर्च एसोसिएट ऑफ सीएसआईआर शामिल हे।

हेलीकॉप्टर गायब होय के मामला म नवा मोड़
रायपुर ले हेलीकॉप्टर गायब होय के मामला म एक नवा मोड़ आय हे। एसएआर एविएशन के कैप्टन जीसी पांडे्य ह बताइस कि एग्रीमेंट के अवधि पूरा होए के बाद ओला वापस ले गे रिहिस। संग ही कंपनी के अधिकारी मन बताइन कि मामला लगभग 8 महीना पुराना हे अब एमे काबर सिकायत दर्ज कराए गे हे, एकर जवाब ओमन करा नइ हे। एकर पहिली दुर्ग पुलिस ले पीयूष देशलहरा ह सिकायत करे रिहिस कि अजीत जोगी के दउरा बर लीज म ले गए हेलीकॉप्टर रायपुर ले गायब हो गे हे। एती अजीत जोगी ह कहिस कि प्रकाश देशलहरा ह ओला हेलीकॉप्टर दे रिहिस, फेर एकर पायलेट मनमानी करत रिहिस एकर चलत ओला अपन कार्यक्रम म बदले बर पड़े रिहिस।

बेरोजगार युवक मन ल ठगइया 3 आरोपी मन ल गिरफ्तार
बालोद पुलिस ह सरकारी नौकरी के नाव म बेरोजगार युवक मन ल ठगइया 3 आरोपी मन ल गिरफ्तार करिन हे। आरोपी मन करा ले 50 हजार नगद, फर्जी दस्तावेज अऊ एक मोटरसाइकल बरामद करे हे। असल म कुछ दिन पहिली थाना म एक मोटरसाइकल चोरी के रिपोर्ट लिखाए गे रिहिस। जेकर उपर आरोपी मन ल पकड़े के बाद खुलासा होइस की ये बेरोजगार युवक मन ल झांसा म लेके ठगत हें।. संग ही 60 लाख 90 हजार रुपिया के धोखाधड़ी करे के मामला आगु आय हे। मामला म एक आरोपी आरक्षक घलो हे जोन अभु घलो फरार बताए जात हे।

पेट्रोल चोरी करइया 2 आरोपी मन ल गिरफ्तार करे हे पुलिस ह
कोरबा पुलिस ह इंडियन ऑयल कॉर्पोरेशन के डिपो ले निकलइया टैंकर ले डीजल अऊ पेट्रोल चोरी करइया 2 आरोपी मन ल गिरफ्तार करे हे। पुलिस ह आरोपी मन करा ले 700 लीटर चोरी के डीजल अऊ 500 लीटर पेट्रोल जब्त करे हे। बताए जात हे कि लंबा बेरा ले गोपालपुर स्थित इंडियन ऑयल कॉर्पोरेशन के डिपो ले अलग-अलग पेट्रोल पंप बर निकलइया टैंकर ले रद्दा म ही बड़े मात्रा म डीजल अऊ पेट्रोल के चोरी के सिकायत पुलिस ल मिलत रिहिस। पुलिस ल पुख्ता जानकारी मिले उपर कटघोरा SDOP के टीम ह चोरी के डीजल अऊ पेट्रोल लेके कोरिया जिला म खपात एक मेटाडोर ल पकड़े हे, कोरबा पुलिस के ये कार्रवाई के बाद गिरोह के सरगना राजेश जायसवाल सहित मेटाडोर के ड्राइवर ल गिरफ्तार कर ले गे हे। उहें पुलिस ये गिरोह म सामिल दूसर सदस्य मन के खोज करे म जुटे हे।

LEAVE A REPLY

Please enter your comment!
Please enter your name here

This site uses Akismet to reduce spam. Learn how your comment data is processed.