Home ताजा समाचार अमित शाह ल खुमरी पहिनाके जोरदार सुवागत करे गिस

अमित शाह ल खुमरी पहिनाके जोरदार सुवागत करे गिस

9
0
महिला महा सम्मेलन
महिला मन ल चौथा दरि घलो रमन सरकार बनाए के संकल्प दिलाइस

दुर्ग। जिला के चरोदा म महिला महा सम्मेलन म भाजपा के राष्ट्रीय अध्यक्ष अमित शाह के मंच म छत्तीसगढ़िया रीति-रिवाज ले खुमरी पहिनाके जोरदार सुवागत करे गिस। कार्यक्रम के बेरा सीएम रमन सिंह, भाजपा के राष्ट्रीय महासचिव सरोज पांडेय के संग ही भाजपा के कई बड़े नेता मउजूद रहिन। ये बेरा शाह ह महिला सक्ति ल नमन करत हुए कहिस कि अपन 35 बछर के राजनीतिक जीवन म अतका बड़े संख्या म महिला मन ल पहिली दरि संबोधित करत हवव। ओहा कहिस कि संगठन ले एक महिला जुड़के पूरा परिवार ल जोड़े के काम करत हे। शाह ह सरकार के योजना के जानकारी देहे के संग ही महिला मन ल चौथा दरि घलो रमन सरकार बनाए के संकल्प दिलाइस। अतका ही नइ शाह ह सीडी कांड ल लेके राहुल गांधी ऊपर जमके हमला बोलिस। शाह ह कहिस कि छत्तीसगढ़ म हमन मोदी अऊ रमन के जोड़ी के नेतृत्व म चुनई लड़बो। फेर कांग्रेस सीडी बांटके महिला मन ल सर्मिंदा करे वाले नेता मन के नेतृत्व म चुनई लड़ही। कार्यक्रम के बेरा मुख्यमंत्री रमन सिंह घलो मंच म मउजूद रहिस। सीएम रमन सिंह ह अपन संबोधन म कहिस कि प्रदेस के विकास म महिला मन के अहम योगदान हे। संग ही ओहा सरकार के द्वारा महिला मन बर चलाए जा रहे योजना के बारे म घलो बताइस, एकर संग ही सीएम ह कहिस कि छत्तीसगढ़ कहे ले ही मातृ सक्ति के सम्मान होथे।

LEAVE A REPLY

Please enter your comment!
Please enter your name here

This site uses Akismet to reduce spam. Learn how your comment data is processed.