Home ताजा समाचार सरकारी करमचारी मन ल सातवां वेतनमान के एरियरस

सरकारी करमचारी मन ल सातवां वेतनमान के एरियरस

8
0

राजनांदगांव। मुख्यमंत्री डॉ.रमन सिंह ह छत्तीसगढ़ राज्य के सरकारी करमचारी मन बर बड़का घोसना करिन। उमन कहिन कि सातवाँ वेतनमान के अठारा महिना के एरियरस के बकाया रासि के भुगतान करमचारी मन ल छै किस्त म करे जाही। एरियरस के पहिली किस्त के भुगतान इही साल 2018-19 म करे जाही। करमचारी मन ल सातवाँ वेतनमान के एरियरस के राशि के रूप म करीबन 3300 करोड़ रूपिया के भुगतान करे जाही। डॉ. सिंह ह राजनांदगांव के महंत सर्वेश्वर दास नगर पालिका उच्चतर माध्यमिक विद्यालय परिसर म आयोजित कारयक्रम म जिला के सहरी क्षेत्र अऊ ग्रामीन क्षेत्र मन के दस-दस हितग्राही मन ल स्मार्ट फोन वितरित करके राजनांदगांव जिला म संचार क्रांति योजना के शुभारंभ करिस।
मुख्यमंत्री ह प्रदेस के सासकीय करमचारि मन के हित म लेहे गए निरनय मन के जानकारी देवत बताइस के एक जनवरी 2016 ले सीधा भरती वाले पद मन म 30 साल के सेवा पूरा करइया करमचारी मन ल चार स्तरीय समयमान वेतनमान दे जाही। ए निरनय के लाभ लाखों करमचारी मन ल मिलही। एखर पहिली एक अपरेल 2006 ले करमचारी मन ल त्रिस्तरीय वेतनमान दे के बेवस्था लागू रहिस। नियोजित संविदा महिला करमचारी मन ल सासकीय महिला करमचारी मन के जइसे 180 दिन के संवैतनिक प्रसूति अवकास दे जाही। अनुकम्पा नियुक्ति बर सबो बेभाग मन म तीसर श्रेनी के सीधा भरती 10 प्रतिसत पद मन के सीमा लागू हे। ए प्रावधान ल डेढ़ महिना बर सिथिल करे गए हे। जल संसाधन विभाग म उप अभियंता मन के सहायक अभियंता के पद म पदोन्नति बर सहायक अभियंता के 505 सांख्येत्तर पद स्वीकृत करे गए हे।
मुख्यमंत्री ह कहिन कि पुलिस कर्मि मन बर 10 हजार अकतहा आवास मन के निरमना करे जाही। डॉ. सिंह ह कहिन कि राज्य शासन ह किसान मन के मान-सम्मान अऊ गउरव बढ़ाय के काम करे हे। ए अवसर म छत्तीसगढ़ राज्य समाज कल्याण बोर्ड के अध्यक्ष श्रीमती शोभा सोनी, छत्तीसगढ़ उर्दू अकादमी के अध्यक्ष अकरम कुरैशी, राज्य भण्डार गृह निगम के अध्यक्ष नीलू शर्मा, राजगामी सम्पदा न्यास के पहिली अध्यक्ष संतोष अग्रवाल, कलेक्टर भीमसिंह संग अबब्ड़ अकन जनप्रतिनिधि, अधिकारी अऊ बड़ संख्या म नागरिक उपस्थित रहिन।

LEAVE A REPLY

Please enter your comment!
Please enter your name here

This site uses Akismet to reduce spam. Learn how your comment data is processed.