जशपुर के किसान खेती म बनावत हें अलग पहचान
- परंपरागत फसल मन के जगह म उद्यानिकी अउ नगद फसल मन ऊपर देवत हें जोर
- चाय, नाशपाती, लीची, स्ट्रॉबेरी के बाद अब सेब के खेती म आजमावत हें हाथ
रायपुर. जशपुर हमेशा ले फसल मन के बिबिधता बर जाने जाथे. इहां के किसान मन परंपरागत फसल मन के संग म उद्यानिकी अउ नगद फसल मन ऊपर घलो जोर देवत हें. मुख्यमंत्री विष्णुदेव साय ह जशपुर म उद्यानिकी फसल मन बर अछ्छा माहौल ला देखत किसान मन ला उद्यानिकी अउ नगद फसल मन बर लगातार बढ़ावा देवत हें. मुख्यमंत्री के निरदेस म इहां के जिला प्रसासन, नाबार्ड अउ उद्यानिकी बिभाग कोती ले ए डाहर म बिसेस कोसिस करे जावत हे. किसान मन ला उद्यानिकी फसल मन बर बिसेस सीख (प्रशिक्षण) अउ तकनीकी रद्दा देखाय (मार्गदर्शन) जावत हे. ए जम्मो कोसिस के सेती पिछले दो-ढाई बछर म इहां के किसान मन परंपरागत फसल मन के जगह म उद्यानिकी अउ नगदी फसल मन म जादा धियान देवत हें. जशपुर के किसान अब चाय, लीची, स्ट्राबेरी, नाशपाती के संग म सेब के बगान घलो तैयार करत हें.
जिला प्रसासन, उद्यानिकी बिभाग, रूरल एजुकेशन एंड डेवलपमेंट सोसाइटी (READS) अउ नाबार्ड के मिले-जुले कोसिस ले जशपुर ह फल उगाय अउ बागवानी म नवां पहचान बनाये हे. ए सब काम मन ले इहां के किसान मन के कमाई मजबूत होय हे अउ खेती-किसानी के आर्थिक ब्यवस्था ला घलो ताकत मिले हे.
जशपुर म सेब के उत्पादन बछर 2023 म सुरू होइस. सेब के खेती अब लगभग 410 एकड़ म फैल गे हे, जेमा लगभग 410 किसान सेब के खेती करत हें. जिला के मनोरा अउ बगीचा बिकासखंड तथा शैला, छतौरी, करदना अउ छिछली जइसन पंचायत मन म लगाय सेब के रुख मन ह ए बछर अब्बड़ अछ्छा गुनवत्ता अउ आकार के फल दिहिन हें. इहां के किसान मन बतॉथें कि जशपुर के सेब ह सुवाद अउ गुनवत्ता म कश्मीर अउ हिमाचल के सेब मन के बरोबर हे. रूरल डेव्हलपमेंट एंड डेव्हलपमेंट सोसायटी के अध्यक्ष राजेश गुप्ता ह बतईन कि जशपुर जिला के 410 किसान मन ह अपन 1-1 एकड़ भुइँया म सेब के खेती करत हें.
उहिने, जिला म नाशपाती के बगान लगभग 3,500 एकड़ म फैले हे, जिहां 3,500 ले जादा किसान नाशपाती के खेती करत हें. जिला के सन्ना, पंडरापाठ, कंवई, महुआ, सोनक्यारी, मनोरा, धवईपाई, गीधा जइसन इलाका मन म नाशपाती के खेती होवत हे. इहें ले नाशपाती ला पैक करके दिल्ली, उत्तरप्रदेश अउ उड़ीसा संग दूसर राज्य मन म भेजे जाथे. नाशपाती के हर बछर के उत्पादन लगभग 1,75,000 क्विंटल तक पहुंच गे हे. किसान मन ला नाशपाती ले प्रति एकड़ हर बछर लगभग एक ले डेढ़ लाख रुपिया के कमाई मिलत हे.
उद्यान बिभाग के अधिकारी के कहना हे कि राष्ट्रीय बागवानी मिशन के अंतर्गत सीख, तकनीकी सहयोग अउ बजार तक पहुंच जइसन योजना मन हें, जेकर ले किसान आत्मनिर्भर बने हें अउ नवां फसल बिबिधता के दुआर ले आर्थिक रूप ले मजबूत होवत हें.
जशपुर म चाय के खेती पहिली ले होवत आवत हे अउ इहां के चाय पत्ती के गुनवत्ता अब्बड़ अछ्छा हे. अब जशपुर म सेब अउ नाशपाती उत्पादन के सुग्घर बिकास ले जशपुर ह न सिरिफ नवां बजार के रूप म बने हे, भलुक इहां के किसान मन के जीवन स्तर म घलो बड़ सुधार आये हे. आघू म ए फसल मन के इलाका ला अउ बढ़ाय के योजना हे.
हमर व्हाट्सएप चैनल ला सब्सक्राइब करव अऊ मया देवव
Whatsapp –https://whatsapp.com/channel/0029VaPmGTXInlqS2WQAhw1n
YouTube –https://youtube.com/@jayjohar?si=AZDI5zciOCT3Oqhw
Facebook –https://www.facebook.com/share/18GsFBTgfd/
