हाइवे मा उप मुख्यमंत्री विजय शर्मा ह करिन नेक्स्ट जेन डायल-112 सेवा के अचकचा निरीक्षण

हाइवे मा रुक के पीड़ित बनके दरज कराइन सिकायत, 112 गाड़ी के आय ऊपर जम्मो समान मन के करिन जांच

रायपुर, कवर्धा जावत बखत उप मुख्यमंत्री अउ गृह मंत्री विजय शर्मा ह बेमेतरा के मेर हाइवे मा रुक के डायल-112 नेक्स्ट जेन सेवा के काम-काज के अचकचा (औचक) निरीक्षण करिन। सेवा के तुरते काम करे के सकति अउ रिस्पॉन्स टाइम ला जांचे बर ओमन खुद डायल-112 मा फोन करिन अउ मारपीट अउ सड़क एक्सीडेंट के पीड़ित बनके सिकायत दरज कराइन। सिकायत दरज कराय के बाद ओमन तीर मा बने एक ढाबा के करा रुक के पुलिस गाड़ी के आये के अगोरा करत रीहिन। तय समय मा डायल-112 के टीम ह मौका मा पहुंचिस, जेकर बाद उप मुख्यमंत्री ह गाड़ी अउ ओकर ले जुड़े जम्मो ब्यवस्था मन के बारीकी ले जांच करिन।

जांच के बखत ओमन गाड़ी मा मिले वाली तकनीकी सुबिधा, बातचीत के साधन, रिस्पांस सिस्टम अउ आपातकालीन बखत मा पुलिस के काम करे के तरीका के जानकारी अधिकारी मन ले लीन। ओमन मौका मा मिले अधिकारी मन ला आम मनखे मन ला तुरते अउ असरदार मदद पहुंचाय के निर्देश घलो दीन। ओमन गाड़ी मा लगे लोकेशन ट्रेकिंग डिवाइस, कृत्रिम बुद्धिमत्ता (AI) के काम करे के तरीका के संग हेल्पलाइन के मदद करे के तरीका अउ ओकर कोति ले दिये जाये वाली जानकारी मन के घलो जांच करिन।

एहा जाने लायक हे कि पाछू 18 मई के केंद्रीय गृह मंत्री अमित शाह ह छत्तीसगढ़ मा सुरक्षा अउ आपातकालीन सेवा मन ला अउ जादा मजबूत बनाय के डहर मा बड़ कदम उठावत 400 नेक्स्ट जेन सीजी डायल-112 गाड़ी मन ला हरी झंडी देखाके रवाना करे रीहिन। नवा तकनीक ले लैस ए गाड़ी मन प्रदेश मा आपातकालीन सेवा मन के पहुंच अउ रिस्पांस टाइम ला अउ अच्चा बनाय मा बड़ भूमिका निभावत हें। ए नवा अउ आधुनिक चरन के तहत जम्मो ब्यवस्था ला तकनीकी रूप ले अउ जादा सक्षम अउ तुरते काम करे वाला बनावत सुरक्षा के मानक अउ मदद करे के सकति ला मजबूत करे बर डायल 112 सेवा मा कृत्रिम बुद्धिमत्ता (AI) अधारित जगह चिनहे के तकनीक (लोकेशन डिटेक्शन) ला जोड़े गय हे। माईलोगन (महिला) मन के सुरक्षा ला पहिली धियान मा रखत ए ब्यवस्था मा पैनिक बटन अउ विशेष निगरानी के सुबिधा घलो जोड़े गय हे, जेकर ले पुलिस मदद, एम्बुलेंस, आगि बुझाय वाली सेवा अउ महिला सहायता हेल्पलाइन ला एक च मंच मा मिलवाय जा सके।

हमर व्हाट्सएप चैनल ला सब्सक्राइब करव अऊ मया देवव
Whatsapp –https://whatsapp.com/channel/0029VaPmGTXInlqS2WQAhw1n
YouTube –https://youtube.com/@jayjohar?si=AZDI5zciOCT3Oqhw
Facebook –https://www.facebook.com/share/18GsFBTgfd/