माउंट एवरेस्ट विजेता अमिता श्रीवास के स्वास्थ्य लाभ बर राज्य सरकार सजग : मुख्यमंत्री विष्णु देव साय
मुख्यमंत्री विष्णुदेव साय ह अधिकारी मन ला समन्वय करके हरसंभव मदद तय करे के निर्देश दीन
रायपुर . जांजगीर-चांपा जिला के होनहार पर्वतारोही अमिता श्रीवास ह दुनिया के सबले ऊंच चोटी माउंट एवरेस्ट (8848 मीटर) ला 22 मई 2026 के सफलतापूर्वक फतह करके छत्तीसगढ़ के नाव ला देस अउ बिदेस (राष्ट्रीय अउ अंतरराष्ट्रीय) स्तर मा उज्जर करे हे। ओकर ए ऐतिहासिक उपलब्धि मा मुख्यमंत्री विष्णु देव साय ह कहिन कि अमिता ह अपन साहस, पक्का इरादा अउ कड़ा मिहनत ले प्रदेश के युवा मन बर प्रेरणा के नवा अधिया रचे हे। मुख्यमंत्री श्री साय ह कहिन कि ए पूरा छत्तीसगढ़ बर गरब के बात आय कि छत्तीसगढ़ के बेटी ह दुनिया के सबले ऊंच चोटी मा तिरंगा लहरा के हमर प्रदेश के मान ला बढ़ाइस।
मुख्यमंत्री विष्णु देव साय ह सोशल मीडिया हैंडल एक्स (ट्विटर) मा पोस्ट करके कहिन कि समिट के बाद बेस कैंप लहुटत बखत अब्बड़ ऊंचाई, शून्य ले लगभग 40 डिग्री सेल्सियस कम तापमान अउ ऑक्सीजन के कमी के सेती अमिता श्रीवास के तबीयत खराब होए के जानकारी मिले हे। ओला हेलीकॉप्टर के माध्यम ले रेस्क्यू करके काठमांडू मा बने नॉर्विक इंटरनेशनल हॉस्पिटल मा भरती कराय गय हे, जिहां ओकर इलाज चलत हे। डाक्टर मन के मुताबिक ओला गंभीर फ्रॉस्टबाइट अउ हाई एल्टीट्यूड (अब्बड़ ऊंचाई) ले जुड़े स्वास्थ्य समस्या होय हे।
मुख्यमंत्री ह कहिन कि जानकारी मिलत च राज्य सासन के बड़े अधिकारी मन ला जरूरी तालमेल (समन्वय) बनाके हरसंभव मदद तय करे के निर्देश दे दे गय हे। ओमन कहिन कि राज्य सरकार अमिता श्रीवास अउ ओकर परिवार के संग ठाढ़ हे अउ ओकर अच्चा इलाज बर लगातार संपर्क अउ सहयोग करे जात हे।
मुख्यमंत्री श्री साय ह अमिता के तुरते बने होए के कामना करत कहिन कि अमिता बिटिया ह बेगी च पूरी तरहन ले नीरो (स्वस्थ) होके अपन घर लहुटय, एही हमर कामना हे। ओकर साहस, धीरज अउ हौसला ह हजारों युवा मन बर प्रेरणा के स्रोत बनही। छत्तीसगढ़ ला ओकर ऊपर गरब हे।
हमर व्हाट्सएप चैनल ला सब्सक्राइब करव अऊ मया देवव
Whatsapp –https://whatsapp.com/channel/0029VaPmGTXInlqS2WQAhw1n
YouTube –https://youtube.com/@jayjohar?si=AZDI5zciOCT3Oqhw
Facebook –https://www.facebook.com/share/18GsFBTgfd/
