धमतरी। आदरस आचार संहिता उल्लंघन के मामल म एक मतदाता उपर थाना सिटी कोतवाली म कार्रवाई होइस हे। पुलिस ले मिले जानकारी म बूथ क्रमांक 139 आदरस बाल मंदिर मोटर स्टैंड वारड के पीठासीन अधिकारी रिखी राम साहू ह अपन सेक्टर प्रभारी संतराम ध्रुव ल सूचित करिस के बिहनियाह मतदाता क्रमांक 28 ह वोट डाले के बाद विविपेट म प्रदरसित चिन्ह पंजा छाप के फोटो खींचके वायरल करिस हे।
ए मामला म थाना सिटी कोतवाली म लिखित सिकायत के बाद कार्रवाई करे गिस ।थाना प्रभारी राकेश मिश्रा ह बताइस के मतदाता रजत जसूजा के खेलाफ धारा 128, 130 लोक प्रतिनिधित्व अधिनियम 1951 के तहत कारयवाही करे गिस हे ।ज्ञात हो के निरवाचन आयोग ह लगातार मतदाता मन ले अपील करत रहिस हे के मतदान केंद्र म मोबाइल ले जाके न जाय। एखर बावजूद कुछु मतदाता मोबाइल लेके पहुंचिन । वीवीपैट के फोटो खींचके वायरल करना आदरस आचरन संहिता उल्लंघन के मामला होथे।
