अधिकारी, वयोवृद्ध नागरिक, दिव्यांगजन अउ महिला मन ले लेके युवा मन ह मतदान बर जागरूकता दिखाइन
रायपुर । राज्य विधानसभा के आम चुनाव 2018 के तहत काली दूसर चरण म 72 सीट मन बर प्रदेश के 19 जिला मन म होए मतदान के महापरव म मतदान केन्द्र मन म मतदाता मन के सइलाब उमड़त रहिस। मनखे मन म अपन मताधिकार के परयोग बर भारी उत्साह देखे गिस। महिला मन ले लेके युवा मन अऊ वयोवृद्ध नागरिक मन ह मतदान म बढ़-चढ़कर हिस्सा लीन।
भारत निरवाचन आयोग के निरदेस म मतदान केन्द्र मन म दिव्यांगजन मन बर व्हीलचेयर के घलोक बेवस्था करेगे रहिस। इही कड़ी म गरियाबंद जिला के विधानसभा बिन्द्रानवागढ़ के संवेदनशील मतदान केन्द्र आमामोरा अऊ ओढ़ म घलोक शांतिपूर्ण ढंग ले आमजन मतदान करे पहुंचिन। जिला के मैनपुर खुरद के रहइया 80 बछर के पांचो बाई पटेल चले म तकलीफ होय के बाद मतदान बर जागरूकता दिखात व्हील चेयर म बइठ के बड़ उत्साह के संग सासकीय प्राथमिक साला के मतदान केन्द्र नंबर 95 म अपन मताधिकार के परयोग करिस। सासकीय बालक प्राथमिक शाला गरियाबंद (विधानसभा राजिम 55) के मतदान केन्द्र नंबर 263 (ब) म बिहनियां 7.30 बजे वोट डारे पहुंचे श्रीमती ललिता सिन्हा ह कहिन के ओ ह सबो काम ल छोड़के मतदान करे आय हे। पहिली मतदान करे जाना हे सोच के उमन ह बिहनिया के चाय घलोक नइ पीन, जबकि श्रीमती दीपा शाहनी अपन नानकुन लइका ल घर म छोड़के बिहनिया-बिहनिया मतदान करे के जिम्मेदारी निभाय बर मतदान केन्द्र पहुंचगे रहिस हे, ताकि जल्दी मतदान करके अपन घर के काम-काज घलोक कर सकय।
इही प्रकार मोखागुड़ा (देवभोग) के दृष्टिबाधित 18 वर्षीय युवक हेमचंद कश्यप ह मतदान के प्रति अपन जिम्मेदारी ल समझत मतदान केन्द्र नंबर 232 म पहुंचके मतदान करिस। बिन्द्रानवागढ़ विधानसभा के अंतरगत कुड़ेरादादर मतदान केन्द्र 51 म महिला च महिला दिखत रहिन। उहां महिला मन के लम्बा लाइन लगे रहिस। एन.सी.सी. अऊ स्काउड गाईड के पढ़ईया लईका मन ह सियान मन अऊ दिव्यांग मन ल मतदान केन्द्र तक लाय-ले जाय म अपन भरपूर सहयोग दीन।
छत्तीसगढ़ विधानसभा के आम चुनाव के तहत दूसर चरण म 72 सीट मन बर होए मतदान के समय राजधानी रायपुर के देवेन्द्रनगर आफिसर्स कॉलोनी स्थित मतदान केन्द्र म भारतीय प्रशासनिक सेवा के वरिष्ठ अधिकारी मन ह घलोक अपन रपिवार के के संग आके मताधिकार के परयोग करिन। एमा राजस्व सचिव एन.के. खाखा, जनसम्परक विभाग के विशेष सचिव अन्बलगन पी., स्वास्थ्य विभाग के आयुक्त आर. प्रसन्ना संग दूसर वरिष्ठ अधिकारी घलोक सामिल रहिन।
मुख्य सचिव अजय सिंह ह घलोक काल बिहनिया छत्तीसगढ़ विधानसभा के आम चुनाव बर राजधानी रायपुर के शंकरनगर स्थित मतदान केन्द्र म आम नागरिक मन के संग लाइन म खड़े रहिके अपन पारी ल आगोर के नंबर आय म मतदान करिन। इइही तरह पुलिस महानिदेसक ए.एन. उपाध्याय ह बिहनिया अपन धर्मपत्नी श्रीमती स्नेहलता उपाध्याय के संग शांतिनगर स्थित सासकीय कन्या हायर सेकेण्डरी स्कूल के मतदान केन्द्र म आके मतदान करिस।
वन विभाग के अपर मुख्य सचिव सी.के. खेतान अऊ गृह अउ वित्त विभाग के अपर मुख्य सचिव अमिताभ जैन ह घलोक देवेन्द्रनगर आफिसर्स कॉलोनी स्थित सामुदायिक भवन के मतदान केन्द्र मतदान करिस।मुख्य निरवाचन पदाधिकारी सुब्रत साहू अऊ अतिरिक्त मुख्य निरवाचन पदाधिकारी एस. भारतीदासन ह राजधानी रायपुर के देवेन्द्रनगर स्थित मतदान केन्द्र म विधानसभा चुनाव बर मतदान करिस। अधिकारी मन ह मतदान के बाद मतदान केन्द्र के सेल्फी जोन म आके सेल्फी घलोक लीन।
Other Articles
