विधानसभा चुनाव खत्म…..प्रसासनिक अमला अलसाइस… कारयकरता मन ले मुलाकात करके हे नेता मन के जोश बरकरार

रायपुर। विधानसभा चुनाव खत्म होय के बाद माहउल म एक अजीब सा सूनापन पसर गेहे। प्रसासनिक अमला अलसाय हुय हे। ये हफ्ता म सरकारी कारयलय म छुट्टीही छुट्टि हवय।  जेखर से ती सरकारी अमला ल पूरा आराम रहही। उहें विधानसभा चुनाव लड़इया प्रत्याशी मन ह अपन जीत बर एड़ी-चोटी के बल लगाइस हे। जेखर ले सारीरिक अउ मानसिक थकान ले स्वाभाविक रूप म उमन ल घलोक जुझना पड़ही। ए सबंध म  प्रदेश के कुछु नेता मन ले   बात करे गिस त उंखर जवाब उम्मीद के विपरीत आइस ।  नेतामन के कहिना हे के उमन ल कोनो थकान नइ होइस हे । उमन म उत्साह अउ उरजा भरपूर  संचार होवत हे। एती आज ईद हवय त नेता मन ह मुस्लिम भाई मन ले  मुलाकात करत रहिन हे।

चुनाव के भागदउड़ के बाद भी नेता मन के जोश बरकरार हे। बुधवार के उमन ह अपन कारयकरता ले मिलत रहिन हे उहें मुस्लिम भाई मन ले मिलके ईद के बधाई घलोक दीन। भाजपा के वरिष्ठ नेता बृजमोहन अग्रवाल ह अपन बंगला म रोजना के तरह लोगन अउ करायकरता मन ले मिलत रहिस हे। जेमा जादा संख्या म कारयकरता अर मुस्लिम समाज के लोगन मन सामिल रहिन हे।  बृजमोहन के कहिना हे के चुनाव के थकान कायरकरता मन  के उत्साह ल देख के दूर होगे हे। अइसे लगत नई के चुनाव ले सरीर थक गेहे, उल्टा कारय करता मन ले मिलके उत्साह अउ बड़ गिस। कारयकरता मन के उत्साह अउ जनता ले मिलइया प्यार ही मोर उरजा के स्त्रोत हे। इही हाल राजेश मूणत के हे। उमन ह घलोक कारयकरता मन ले चुनाव ल लेके चरचा करत दीखन। उंखर गोंठ सुन के राजेश  के चेहरा म जोश अउ उत्साह झलकत रहिस हे। उमन कहिन के चुनाव के थकान ल कारयकरता मन ह दूर कर दीस हे। जइसे रुझान मिलते हे, ओखर ले रायपुर पश्चिम ले हमार जीत होही अउ प्रदेस म भाजपा के सरकार चउथी बार बनही।   कुछु अइसने जवाब मिलिस  कांग्रेस के वरिष्ठ नेता धनेन्द्र साहू ले । उमन कहिन के चुनाव म कोनो थकान नइ होइस। जनता के बीच पहुंचत हन । आज ईद हे त अपन मुस्लिम भाई मन ले मुलाकात करत हन ।  संगे संग कारयकरता मुलाकात करे बर पहुंचत हे। उंखर उत्साह ल देखके मन ल सुकून मिलत हे। रायपुर ग्रामीन के विधायक सत्यनारायण शर्मा  ह कहिन के थकान जइसे कोनो बात नइए।  थकान दूर करे बर बाहिर जाय के मैं कभु जरुरत नइ समझेव। कार्यकर्ता मन के बीच  म ही मोर मूड फ्रेस होथे।