रायपुर। राजधानी म गुरूवार के शिक्षाकर्मी एक बार फिर भीख मंगाते नजर आइस। वजह वही पुराना रहिस । शिक्षाकर्मी मन ल विगत 2-3 माह ले वेतन नइ मिले हे। ऐखर बर शासन -प्रशासन ले कई बार चरचा कर डरे हे। लेकिन नतीजा सिफर निकलिस।
संयुक्त शिक्षाकर्मी संघ के बैनर तले गुरूवार के शिक्षाकर्मी मन हाथ म कटोरा लेके प्रदर्शन करिस। सर्व शिक्षा अभियान के अंतर्गत कार्यरत पंचायत संवर्ग के करीब 90 हजार शिक्षक मन ल विगत 2 – 3 माह ले वेतन नइ मिले हे। ऐखर ले नाराज संयुक्त शिक्षा कर्मी संघ के सदस्य शिक्षाकर्मी मन आज हाथ म कटोरा लेकर प्रदर्शन करिस हे। संघ अध्यक्ष केदार जैन ह बताइस कि वेतन ल लेके हर दो-तीन माह म हमन ल सड़क म उतरे बर पड़थे। ऐ समस्या स्थाई हल ढूंढे बर अधिकारी मन कोई रूचि नइ लेवय। ओखर मन के पास शीघ्र वेतन देबो के रटारटाया जवाब हवय। ओखर बाद चुप बैइठ जाथे। ऐही वजह ले एक बार फिर शिक्षाकर्मी मन हाथ म कटोरा ले के सर्व शिक्षा अभियान के दफ्तर के बाहर धरना म बैइठ गे अउ नारेबाजी करन लागिस। अउ मांग करिस कि ओमन ल 3 माह के वेतन जल्द ल जल्द दिए जाए।