अपन-अपन क्षेत्र मन म रात रुकही जनप्रतिनिधि : रमन

रायपुर। कुशाभाऊ ठाकरे परिसर म रविवार के होय बइठक के बाद सीएम रमन सिंह ह कहा कि सांसद, विधायक अउ पदाधिकारी अपन-अपन प्रभार के क्षेत्र मन म रात रुकही। 5 मई तक ग्राम स्वराज अभियान म विभिन्न कार्यक्रम होंही। 1 मई ले विकास यात्रा सुरु होही, जे ह एक महीना तक चलही। ये पहला चरन होही। येखर बाद अगस्त म दूसरया चरन के यात्रा की शुरुआत होगी। राहुल गांधी के दौरे पर सीएम रमन सिंह ने कहा कि सबको आना चाहिए, अवसर भी है, सबकी भागीदारी होही। प्रदेश कार्यालय म रविवार के होय भाजपा के बइठक म विधायक मन के कामकाज के चरच करे गिस । इहां सबले रिपोट कारड मांगे गिस कि कौउन ह अभी तक के का करे हे। बइठक म ये बात के भी फइसला ले गिस कि ग्राम स्वराज यात्रा के दउरान सभी जनप्रतिनिधि मन ल अपन इलाका म समय देय ल पड़ही। संगे संग विभिन्न आयोजन के दउरान घलो उमन ल सक्रिय रहिना होही।

कांग्रेस के बइठक म राहुल गांधी के दउरा ल लेके चरचा होइस
रायपुर म राहुल गांधी के दउरा ल लेके आयोजित प्रदेस कांग्रेस कमेटी के बइठक खत्म हो गिस। बइठक म राहुल गांधी के दउरा ल लेके चर्चा होइस। प्रदेस कांग्रेस अध्यक्ष भूपेश बघेल ह बताइस कि 24 अप्रैल के राहुल गांधी रायपुर आही, अऊ पंचायती राज के 25वीं वर्सगांठ पूरा होए म आयोजित कार्यक्रम म सामिल होही। जेकर तहत पहिली कार्यक्रम सीतापुर म आयोजित होही। जेमें राहुल गांधी किसान सम्मेलन ल संबोधित करही। अऊ रायपुर के इंडोर स्टेडियम म पंचायती राज बेवस्था के 25वीं वर्सगांठ म आयोजित कार्यक्रम म सामिल होही। जेमें पंचायती राज के जम्मों प्रतिनिधि मउजूद रही।

बाइक मकान के बाउंड्रीवाल ले टकराइस युवक के मउत
कोरबा के अमगांव म एक बाइक सावर युवक मकान के बाउंड्रीवाल ले टकरा गिस। जेकर ले मउका म ही ओकर मउत हो गिस। बाउंड्रीवाल म घंटों तक युवक लटकत रिहिस, फेर कउनो ओला तरि नइ उतारिस। मृतक के नाव मनोज चउहान बताए जात हे, जोन ह मलगांव के निवासी रिहिस।

ट्रैक्टर-ट्राली पलटे ले एक बड़े हादसा होइस हे
कांकेर जिला के अंतागढ़ म ट्रैक्टर-ट्राली पलटे ले एक बड़े हादसा होइस हे। हादसा म 24 ले ज्यादा लोगन मन घायल हो गिन हे, जेमे ले 4 के हालत गंभीर बताए जात हे। बताए जात हे कि ट्रैक्टर-ट्राली म सवार ग्रामीन मन कउनो कार्यक्रम म सामिल होए बर दूसर गांव जात रिहिन। रद्दा म ट्रैक्टर अनियंत्रित होके पुलिया के तरि गिर गिस। जेमें कई लोगन मन घायल हो गिन। घायल मन ल बेहतर इलाज बर कांकेर अस्पताल रेफर कर दे गे हे। उहें ग्रामीन मन के कहना हे कि ट्रैक्टर चालक नसा म धुत रहिस। अऊ ओकर लापरवाही ले ये हादसा होइस हे… सिकायत म पुलिस ह ट्रैक्टर चालक ल गिरफ्तार कर ले हे।

पहिली पत्नी के मया म करिस अपन दूसर पत्नी के हत्या
गरियाबंद म एक बुजुर्ग ह अपन पहिली पत्नी के खुसी बर दूसरी पत्नी के हत्या कर दिस। आप मन ल बता दन कि चमारराम साहू ह दू बिहाव करे रिहिस। फेर ओकर दून्नों पत्नि मन आपस म रोज झगड़ा होत रहय। चमारराम ह अपन पहिली पत्नी गौरी के बेटी बर जेवर बनवात रिहिस, फेर ओकर दूसर पत्नी कृष्णा बाई ह एकर बर मंजूर नइ रिहिस। ये बात ल लेके दून्नों के बीच झगड़ा होइस। अऊ आरोपी ह गुस्सा म आके कृष्णा बाई के गला दबाके हत्या कर दिस। फेर अंतिम संस्कार म पहुंचे मृतका के भाई ल हत्या के सक होइस अऊ ओहर एकर सिकायत पुलिस ले करिस। जेकर बाद आरोपी ह अपन जुर्म कबूल करिस।

मुंगेली म मध्यान्ह भोजन म चाउर घोटाला
मुंगेली म मध्यान्ह भोजन म चाउर घोटाला के मामला आगु आए हे। इहां सहसपुर संकुल के तत्कालीन समन्वयक उपर 45 क्विंटल चाउर के हेराफेरी करे के आरोप लगे हे। आप मन ल बता दन कि सहसपुर संकुल के कई स्कूल म मध्याह्न भोजन के चाउर के स्टाक म गड़बड़ी के सिकायत मिले रिहिस। सहायक ब्लाक सिक्षा अधिकारी राजेंद्र निर्मलकर ह जांच म पाइस के पूर्व समन्वयक ह स्कूल के प्रधानपाठक ल झांसा म राख के 45 कुंटल चाउर के गोलमाल करे रहिस… मामला म जांच रिपोर्ट जिला कार्यालय ल भेज देय गेय हे…