आजो नइ हो पाइस मुख्यमंत्री के नाम के ऐलान ….काली होही 12 बजे मीटिंग के

रायपुर। प्रदेस प्रभारी पीएल पूनिया ह कहिन के , काली दुपहर 12 बजे मीटिंग होही, ओखर बाद ही ऐलान कर जाही के छत्तीसगढ़ के मुख्यमंत्री कउन होही। आघू उमन कहिन के, जब राज्यपाल हमन ल सपथ ग्रहण समारोह बर 17 दिसंबर संझा 4:30 बजे के टेम दे हे त जल्दी के का बात हे ? फिलहाल ताम्रध्वज साहू समेत डॉ. महंत, टीएस सिंहदेव अउ भूपेश बघेल दिल्ली म ही हवय। उमन रविवार के रायपुर पहुंच ही। एखर बाद इहां विधायक दल के बइठक के बाद मुख्यमंत्री पद ल लेके अंतिम निरनय ले जाही।

ताम्रध्वज साहू के दावेदारी खत्म ?
एती छत्तीसगढ़ के मुख्यमंत्री पद बर चार दावेदार म एक यानी ताम्रध्वज साहू के दावेदारी खत्म हो गे हे। सूत्र मन के हवाले ले मिले जानकारी म पहिली मुख्यमंत्री पद बर ताम्रध्वज साहू के नाम फाइनल कर देय गे रहिस हे। एखर बाद बाकी दावेदार पीसीसी अध्यक्ष भूपेश बघेल, टीएस सिंहदेव अउ डॉ. चरणदास महंत ह मोरचा खोल दिस। हाईकमान के ए निरनय म पुनर्विचार करे बर शनिवार के दुपहर दोबारा राहुल गांधी के निवास म बइठक होइस।