इंहा घलो सासन के पइसा के दुरूपयोग करिस पीएएचई  ह

पद्ममिनी मरावी, कोरिया । लोक स्वास्थ्य यांत्रिकी विभाग बैकुंठपुर  ह सासन के पइसा मन के दुरुपयोग करत हे। इहां जतका भी टंकी बने हे उंखर उपयोग नहीं होवत हे।  कोरिया जिला के बचरा पोड़ी क्षेत्र म पीएचई विभाग ह डीएमएफ मद ले लाखों रुपिया के कुआ पंम्प हाउस अउ टंकी के निरमान करिस हे।  

विभाग ह ए  टंकी सात-आठ महिना पहिली इला बनाय हे।  आज तक एखर  उपयोग नइ होए हे।  एमा  ग्रामवासी मन के कहिना हे के  टंकी त बना देय गेहे, लेकिन ए ह कुछु काम के नइए। काबर के इमा पानी नइ भरावय। लाखों रुपिया ले बने टंकी म घटिया क्वालिटी के  ईंट लगाय गेहे। एमा पीएचई ह काफी घटिया सामाग्री के उपयोग करे म कोनो कसर नइ छोड़े हे।  ए साफ दिखत हे के  महज सात- आठ महिना म ही दरार  पड़ गेहे।

टंकी के तीर कन्या छात्रावास हे । इहां के नोनी मन ल पानी के काफी किल्लत के सामना करना पड़त हे। लइका मन ह पानी बर बाहिर जाए ल मजबूर हे।  कुल मिला के पीएचई विभाग टंकी बनाके सासन के पइसा मन के दुरुपयोग करत हे।  देखा जाए त टंकी के एक मामला नइए। एखर अलावा कोरिया जिला म बचरा पोड़ी  अउ  तोलका, सकरा समेत कई दूसर  जगा मन म बनाए गे टंकी के  एही हाल हे। ए टंकी मन के उपयोग नइ होवत हे।

पीएचई विभाग के लचर बेवस्था ले बचरा पोड़ी के ग्रामीन म काफी आक्रोस हे।  उहें ए मामला म लइका मन के कहिना हे के  ए टंकी के उपयोग न होय ले  हमन ल  पानी बर काफी तकलीफ होवत हे।