इस्तीफा देवत हे ताम्रध्वज साहू ह ….

 दुर्ग। 17 दिसम्बर के दुर्ग सांसद ताम्रध्वज साहू अउ टीएस सिंहदेव ह  कैबिनेट मंत्री के सपथ लीन।  एखर बाद अब दुर्ग लोकसभा के सांसद ताम्रध्वज साहू  ह लोकसभा के सदस्यता ले इस्तीफा देंही। एखर बर आज उमन  दिल्ली रवाना हो गे, जिहां लोकसभा के शीत कालीन सत्र म हिस्सा लेके 22 दिसम्बर के अपन इस्तीफ़ा लोकसभा स्पीकर सुमित्रा महाजन को सउपिही। एती दू मंत्री तय करने के बाद भूपेश घलो अपन कैबिनेट ल फाइनल करे बर आजेच दिल्ली जावत हे। प्रदेश म मंत्रीमंडल म सामिल होए बर कतको दिग्गज कतार म हे। अब बचे 10 मंत्री पद के दउड़ म वो नेता घलोक हे जे 5 ले जादा बेर के विधायक हवय।

कांग्रेस के एक मात्र सांसद हवय साहू ह

आपमन ल बता दन के 2014 म होए लोकसभा चुनाव म ताम्रध्वज साहू कांग्रेस के प्रदेस ले एकमात्र सांसद रहिस हे। उमन बीजेपी के दिग्गज नेता सरोज पांडेय ल हराइस। उहें हाल म होए विधानसभा चुनाव म कांग्रेस पार्टी ह साहू ल दुर्ग ग्रामीन ले अपन उम्मीदवार बनाइस। पार्टी के भरोसा ल  कायम रखत हुए ताम्रध्वज लगभग 27 हजार 112 वोट ले विजयी होइन। एखर बाद साहू ह 17 दिसम्बर के केबिनेट मंत्री के सपथ लीस। बहरहाल, ताम्रध्वज साहू लोकसभा के सदयस्ता ले इस्तीफा देके प्रदेस म कैबिनेट मंत्री के पद ल सम्भाल ही।