ईओडब्ल्यू ल मिलिस एक अउ जांच के जुम्मेदारी

रायपुर । प्रदेश के कांग्रेस सरकार ह एक अउ बड़ फइसला लेवत हुए ईओडब्ल्यू ल तीसर जांच सउपिस हे। ए बेर मुख्यमंत्री भूपेश बघेल के निरदेस म जनसंपर्क विभाग म होए घोटाला के जांच ईओडब्ल्यू ले  कराए के फइसला लिस ले गेहे। जनसंपर्क विभाग उपर बीजेपी सरकार के बेरा म आवंटित बजट ले ज्यादा खर्च करे के आरोप हे।

बताय जात हे के , भाजपा सरकार के बेरा म जनसंपर्क विभाग  ह करीब ढाई सौ करोड़ के एवज म 400 करोड़ रुपिया खर्च करे हे। ए दउरान बहिर के कई बड़ कंपनी मन ल  करोड़ों रुपिया के भुगतान करे गेहे। जे कंपनी मन ल भुगतान करे गेहे ओ मा  मुंबई, गुजरात  समेत  कई अन्य राज्य मन के बड़ कंपनी मन सामिल हे।

61 करोड़ के भुगतान

एखर अलावा ए बात घलो आघू आइस हे के , विभाग ह चुनावी आचार संहिता लगे के दिन ही 28 करोड़ रुपिया  के आरओ जारी करे गिस। बता दन के, भूपेश सरकार ह 48 संस्थान मन के निविदा रद्द कर देहे।  निरस्त करेगे 21 निविदा के तहत 48 संस्थान छत्तीसगढ़ संवाद म सूचीबद्ध हवय। ए संस्थान मन के निविदा प्रक्रिया ल लेके जांच घलो राज्य सरकार ह सुरू कर देहे। ए संस्थान मन ल  दे गे  कुल 85 करोड़ के काम म ले 61 करोड़ के भुगतान करे  जा चुके हे।