रायपुर । मुख्यमंत्री के ओएसडी उज्ज्वल दीपक के चयन विश्व के प्रतिष्टित, न्यूयॉर्क स्थित कोलंबिया यूनिवर्सिटी म एक वर्षीय मिड करियर पब्लिक एडमिनिस्ट्रेशन प्रोग्राम बर होय हे। एखर सूचना रात म ओ मन ल मिलिस। पूरा संसार ले अड़बड़ कठिन प्रक्रिया के माध्यम ले सिरिफ 32 चुनिंदा मनखे मन ल ही ए प्रोग्राम बर चुने जाथे। कई मापदंड अउ महत्वपूर्ण पद मन म स्थापित अउ समाज बर संकल्पित मनखे मन ल ए प्रोग्राम म प्राथमिकता देहे जाथे। आप मन ल बता देवन कि उज्ज्वल ह मुख्यमंत्री डॉ रमन सिंह के ओएसडी बने के पहिली मुकेश अम्बानी के संग रिलायंस के कोर लीडरशिप टीम म काम करे रहिन। अऊ देशभर के 12 युवा लीडर म सामिल उमन रिलायंस के भविष्य म रणनीति तय करइया टीम म योगदान दे रहिस हे।
अपन अच्छा खासा कॉर्पोरेट करियर ल छोड़ के छत्तीसगढ़ राज्य वापस आके नवाचार अउ लोक प्रशासन के क्षेत्र म उंखर समर्पण भावना अउ लगन ही ह ऊंखर चयन के मुख्य कारण रहिस। राज्य म राष्ट्र गान ल फिल्म मन के पहिली चलाये जाय संबंधी नीतिगत निर्णय अउ राज्य के संस्कृति अउ पर्यटन म एक फिल्म बनाके जम्मो सिनेमाघर मन म चलाय के श्रेय ओ मन ल ही जाथे। आप मन जानतेच होहू के न्यूयॉर्क स्थित कोलंबिया यूनिवर्सिटी विश्व के ख्यातिप्राप्त विश्वविद्यालय मन म एक हे अऊ एला आईवी लीग यूनिवर्सिटी कहे जाथे। लोक प्रशासन म ए यूनिवर्सिटी के ख्याति पूरा विश्व म हे। भारतीय संविधान के बनइया बाबासाहेब भीमराव अंबेडकर ह सन 1915 म इन्हें एमए के डिग्री प्राप्त करिन अऊ 1927 म अर्थशास्त्र म PHd करिन। इहां उंखर मूर्ति घलोक स्थापित करे गे हे। अमेरिका के पहिली राष्ट्रपति बराक ओबामा घलव ए यूनिवर्सिटी के छात्र रहे हे।
