एटीएम ले कैश निकालना पड़िही भारी…अब नइ  मिलय मुफ्त सुविधा मन…

रायपुर। एटीएम ले पइसा निकालना अब भारी पड़इया हे। काबर के अब बैंक शुल्क वसूले के तइयारी म हे।  एखरे संगे संग बैंक उपभोक्ता मन ल जीएसटी के मार घलो  पड़ही। एखर चलत बैंक के अंदर या फेर बाहिर होवइया सबो तरह के लेनदेन म टैक्स देना होही। एखर ले ग्राहक मन ल बैंक अउ एटीएम म मिलइया मुफ्त सुविधा घलो खत्म हो जाही। अभु ग्राहक अपन बैंक के एटीएम ले पांच बार मुफ्त ट्रांजेक्शन कर सकत हे। नवा व्यवस्था लागू हो जाय के बाद ए मुफ्त ट्रांजेक्शन खत्म हो जाही।

चेक भुनाय ले लेके एटीएम ले कैश निकाले म अतिरिक्त पइसा देना होही। एटीएम म होवइया नॉन बैंकिंग ट्रांजेक्शन के फीस  ल घलो 18 रुपिया ले बढ़ाय के कोसिस करे जात हे। ए ह बढ़ के 25 रुपिया हो सकत हे।  ए फीस ल 2012 म तय करे गे रहिस हे। तब ले एमा कोनो बदलाव नइ होइस हे।  एटीएम ले एक ट्रान्जेक्शन के लागत एक दिन के 23 रुपिया आथे।

वर्तमान म सबो बैंक एटीएम म होवइया कैश ट्रांजेक्शन बर 15 रुपिया अउ  नॉन कैश ट्रांजेक्शन करे म  खाता ले  5 रुपिया काटथे । ए चार्ज हर महीना फ्री म मिलइया ट्रांजेक्शन के ऊपर लगत हे।

ए सेवा मन म  लगही जीएसटी……जे  मुफ्त सेवा मन म  बैंकों ह 18 फीसदी जीएसटी लगाय के प्रस्ताव देय हे, ओमा  चेक बुक, एटीएम के प्रयोग, अतिरिक्त क्रेडिट कार्ड अउ पेट्रोल-डीजल के कार्ड के  भुगतान म  मिलइया रिफंड सामिल है। फिलहाल भारतीय स्टेट बैंक, आईसीआईसीआई अउ एचडीएफसी बैंक  ए चार्ज ल लगाना सबले  पहिली सुरू करही। एखर बाद अन्य बैंक  घलो ए तरह के घोषणा कर सकत हे।