एनएमडीसी प्रबंधन के खेलाफ मोरचा खोल दिस स्थानीय लोगन मन

दंतेवाड़ा। आदिवासी महासभा ह गुरुवार बिहनिया ले नउकरी बर स्थानीय लोगन ल प्राथमिकता देय के मांग लेके एनएमडीसी बचेली के गेट के बाहर चक्काजाम कर दिस। ये मुद्दा ल लेके प्रबंधन अउ महासभा के प्रतिनिधिमंडल के बीच बइठक चलत रहिस हे।
स्थानीय लोगन मन ह आदिवासी महासभा के बैनर तले एनएमडीसी प्रबंधन के खेलाफ मोरचा खोल दिस हे। एनएमडीसी बचेली के गेट के बाहिर आदिवासी महासभा ह गुरुवार के चक्काजाम कर दिस हे। प्रदरसनकारी एनएमडीसी मेन गेट के आगू जमा होइस हे। ये दउरान प्रदरसनकारी मन ह करमचारी मन ले भरे बस ल घलो रोक दिस हे। प्रदरसन के कारन एनएमडीसी म लौह अयस्क के उत्पादन ठप्प पड़ गिस ।
आदिवासी महासभा के मांग हे के एनएमडीसी म नउकरी म स्थानीय लोगन ल प्राथमिकता दे जाय। येखर अलावा प्रदरसनकारी मन ह प्रबंधन ऊपर एल-2 भरती म वादाखिलाफी के आरोप लगाइस हे। प्रदरसनकारी मन के कहिना हे कि बार-बार आश्वासन के बाद घलो प्रबंधन उंखर हित म निरनय नइ लेवत हे। ये मांग पूरा होय तक प्रदरसन बंद नइ होहीं। प्रबंधन ले प्रदरसनकारी मन बात करिस , लेकिन कोनो नतीजा नइ निकलीस हे।