ए घोषणा मन बनत हे  कांग्रेस के सरकार  बर मुसीबत के सबब

…..सीएम बघेल ह करिस अपील

रायपुर। कहथे के कोनो बात के दावा अउ घोसना घलो कई मउका म मुसीबत के सबब बन जाथे। अइसने ही कुछु होवच हे छत्तीसगढ़ म नवां कांग्रेस सरकार के संग।  छत्तीसगढ़ म कांग्रेस के सरकार बनत ही किसान मन के करजा माफ, पच्चीस सौ रुपिया म  धान खरीदी जइसे अहम निरनय ले गेहे।  जेखर बाद कांग्रेस के ही घोसना पत्र म सामिल बिजली बिल हाफ अउ संपत्ति कर म पचास फीसदी के छूट अब सरकार बर मुसीबत बन गेहे।

दरअसल करजा माफी अउ समर्थन मूल्य म सरकार  के निरनय ले के बाद कई लोगन मन ह  बिजली बिल अउ संपत्तिकर जमा करे म आनाकानी करत हवय। काबर के उमन सरकार के घोसना के इंतजार करत हे।  जेला लेके अब खुद मुख्यमंत्री ह लोगन ले अपील करे हे के उमन बिजली बिल हो या फेर संपत्ति कर समय म  जमा करय।  जब सरकार ए सबंध म निरनय ले ही त लाभ सबो ल मिलही।

सीएम के अपील उपर बीजेपी  के तंज

भले ही सीएम ह एला लेके जनता ले  अपील करत हे, मगर बीजेपी सीएम के ए अपील उपर तंज कसत हुए वादा खेलाफी के आरोप लगावत हे।  छत्तीसगढ़ भाजपा के उपाध्यक्ष सुनील सोनी के कहिना हे सरकार अब उपभोक्तामन के संग वादा खेलाफी करत हवय।  छत्तीसगढ़  कांग्रेस  ह भले ही चुनाव जीते बर अइसन घोसना करे हे , मगर अब इहीं घोसना मन  कांग्रेस के सरकार बने के बाद उंखर बर मुसीबत के सबब बनत हवय। बहरहाल देखना होही के सीएम बघेल के ए अपील के लोगन उपर कतना असर पड़त हवय।