ए वजह ले पंद्रह ब्लॉक के लोगन के इहां मेहमान मन आना बंद कर दिस

कोरबा। कोरबा के पम्प हाउस मैगजीन भांठा अउ पंद्रह ब्लॉक के लोगन बर   स्वच्छ भारत अभियान  म बने एसएलआर सेंटर  ह मुसीबत बन गेहे।  निगम के वार्ड मन ले निकइया कचरा एहे डंप कर देय जात हे।  पूरा इलाका कचरा ले  उठत  सड़ांध ले परेसान हे।  दरअसल निगम म जोगेश लाम्बा के महापौर रहत पंद्रह ब्लाक अउ पम्प हाउस मैगजीन भांठा के बीच आवारा मवेसी मन अउ दूसर जानवर मन बर ठिकाना के तउर म केंद्र बनाय गे रहिस हे। कई साल तक ए केंद्र खाली रहिस हे।  लिहाजा नगर निगम ह एला मणिकांचन केंद्र के रूप म इस्तेमाल सुरू कर दिस अउ ए तरह ले सफाई कर्मी विभिन्न वार्ड मन के गीला-सूखा कचरा ल एही डंप करे लगिस।  अब आलम ए हे के कचरा के ए अम्बार ले उठइया सड़ांध के वजह ले इहां के रहवासी मन के जीना दुस्वार हो गिस हे।

लोगन के कहिना हे के  ए सड़ांध के वजह  ले उंखर इहां मेहमान मन घलोक  आना बंद कर दिस हे। इहां ले  गुजरइया लोगन  मुंह ढंकके गुजरथे। ए गन्दगी ले कई तरह के गंभीर बीमारी मन के खतरा घलोबने रहिथे।  ए केंद्र के बगल म ही गुरु घासीदास के नाम म एक निजी स्कूल संचालित हे। ए स्कूल के लइका मन पूरा दिन मुंह ढंकके पढ़ाई करे म  मजबूर हे। स्कूल स्टाफ  के कहिना हे के कचरा ले उठइया तेज सड़ांध ले उमन ल भारी दिक्कत पेस आथे। एसएलआर सेंटर के वजह ले ही पूरा क्षेत्र म मच्छर के प्रकोप घलो तेजी से फइल गिस। एखर सिकायत नगर निगम के अधिकारी ले कई दफा  करे जा चुके हे,  लेकिन न निगम के अफसर ए केंद्र  ल हटाए म  कोई गंभीरता दिखात हे अउ न  ही जनप्रतिनिधि मन ल क्षेत्र के लोगन के सेहत ले कोनो सरोकार हे।