ए विधानसभा के चुनाव परिनाम पहिली आही अउ सबले आखिर म कवर्धा के

रायपुर । राज्य के 90 विधान सभा मन के मतगणना 11 दिसंबर के करे जाही।  मनेंद्रगढ़ विधानसभा के चुनाव परिनाम सबले पहिली आए के अनुमान हे। सबले  अंत म कवर्धा विधानसभा के चुनाव परिनाम आही। इहां मतगणना 30 चरन म पूरा होही।  एखर सेती सबले आखिर  म परिनाम आए के अनुमान हे।

मुख्य निर्वाचन पदाधिकारी सुब्रत साहू ह पत्रकार  मन ल बताइस के प्रसासन ह सबो 90 विधानसभा मन के मतगनना  बर 5184 गणना कर्मी अउ 1500 माइक्रो ऑब्जर्वर नियुक्त  करे हे।  प्रत्येक हाल म मतगनना  बर 14 टेबल के संग रिटर्निंग ऑफिसर के मेज समेत  डाक मतपत्र के गणना मेज होही।  प्रत्येक टेबल म चार ले पांच कर्मचारी तइनात कर जाही। ए बार प्रत्येक विधानसभा के एक वीवीपैट के पर्ची के घलो गिनती करे जाही।

ईवीएम ले मतगणना के दउरान ही रिटर्निंग अधिकारी रेंडमली एक वीवीपैट के पर्ची मन के गनना कराही। ए बात के निरनय करे के अधिकार आरओ के तीर रहही।  7 बजे ले पहिली पहुंचना होही। स्ट्रांगरूम मतगनना  बर  बिहनियां  7 बजे स्ट्रांगरूम खोले जाही। स्ट्रांगरूम के भीतर अधिकृत व्यक्ति ह प्रवेस कर सकही। बिहनिया  8 बजे ले काउंटिंग सुरू होही। राजनैतिक दल मन के प्रतिनिधि मन , प्रत्यासी मन अउ उंखर एजेंट मन ल सुविधा के लिहाज ले बिहनिया  7 बजे ले पहिली पहुंचना होही।  काउंटिंग एजेंट निर्धारित टेबल म ही बइठ के काउंटिंग के काम देख सकत हे।  उमन दूसर टेबल मन म आ जा नइ सकय।  रिटर्निंग ऑफिसर के टेबल के तीर अभ्यर्थी या उंखर एजेंट बइठ सकही।

मतगनना के दउरान प्रथम पंक्ति म मान्यता प्राप्त राष्ट्रीय दल के काउंटिंग एजेंट, दूसर पंक्ति म राज्य ले मान्यता प्राप्त दल मन के काउंटिंग एजेंट बइठही। तीसर स्थान म अन्य राज्य मन ले मान्यता प्राप्त दल मन के काउंटिंग एजेंट बइठ सकही। अंतिम पंक्ति म निरदलीय अभ्यर्थी के काउंटिंग एजेंट बर स्थान तयकरे गेहे।  मतगनना के हर चरम म वीडियोग्राफी कराए जाही।