ए सैनिक ह छात्र मन जागरूक करे बर करत हे ए काम

    पद्मिनी मरावी, कोरिया। जिला मुख्यालय बैकुंठपुर के यातायात विभाग म पदस्थ सैनिक महेश मिश्रा ह अपन स्वयं के खरचा म जिला के सबो सासकीय महाविद्यालय मन म यातायात संकेतक बोर्ड लगावत हे। जेकर ले महाविद्यालय मन म  अध्ययनरत छात्र-छात्रा मन ल  यातायात संकेतों के पूरा जानकारी मिल सकय।  गउरतलब हे के एखर पहिली मिश्रा जिला भर के स्कूल कॉलेज मन म निरंतर कैंप लगाके छात्र-छात्रा मन ल यातायात नियम, संकेत अउ चिनहा मन  के  जानकारी प्रदान करिस हे। यातायात संकेतक बोर्ड के लगे ले  छात्र मन ल  ड्राइविंग लाइसेंस बनवाए म आवइया असुविधा ले मुक्ति मिलही अउ लाइसेंस बनवाय बर छात्र मन के रुझान बढ़ही। संगे-संग सड़क म चलत समय नियम मन के जानकारी होए ले दुर्घटना मन म कमी आही।

जिला म यातायात के प्रति लोगन ल जागरूक करे म एक अइसे नाम जे आज हर कोनो के जुबान म हे । यातायात विभाग म सैनिक के पद म पदस्थ महेश मिश्रा ह यातायात जागरूकता अभियान ल समाज सेवा के रूप म अपनाइस लेकिन अब ए उंखर बर एक जुनून बन चुके है।  मिश्रा निरंतर कैंप लगाके लोगन ल यातायात के प्रति जागरूक करत हे।  ये कार्य म होवइया खरचा ले खुद उठाथे। स्वयं के खरचा म वाहन चालक मन ल निःशुल्क चश्मा, सहर के प्रमुख चउराह अउ सड़क   के गड्ढा ल भरना, सड़क दुर्घटना म घायल मन के निरंतर मदद करना, कुपोषित लइका मन ल पोषण आहार के वितरण के संगे संग यातायात संकेतक बोर्ड लगवाए के कार्य करत हे। एखर  नेक काम के सहर म चारों तरफ प्रसंसा होवत हे।  अउ अनेक अवसर मन म  इमन ल सम्मानित घलो करे गेहे।

मिश्रा ह बताइस के उंखर लक्ष्य स्कूली सिक्षा पाठ्यक्रम म माध्यमिक,उच्च माध्यमिक अउ उच्चतर माध्यमिक स्तर म एक पाठ यातायात के सामिल कराए के हे। जेखर ले छात्र मन ल पढ़ाई के संग यातायात के नियम, संकेत अउ चिनहा मन के बारे म  पूर्ण जानकारी प्राप्त हो सकय। अइसन करले बढ़ती सड़क दुर्घटना मन म रोक लग सकत हे।  सड़क दुर्घटना म मउत के मामला म सबले अधिक युवा वर्ग के होथे। ए मउत ल रोके बर सबले अच्छा जरिया होही के छात्र जीवन म ही नियम मन के पूरा जानकारी प्रदान कर देय जाए । कबर के सड़क दुर्घटना म अधिकांश लोग अइसे होथे जे जानकारी के अभाव म दुर्घटना के सिकार होवत हे।