ओपी चौधरी के जीत म अपन मूंछ मन ल दाव म लगाइस ए शख्स ह

रायगढ़ । चुनाई म कउन जीतही अउ कउन हराही एखर फइसला त 11 दिसम्बर के होही । लेकिन समर्थक मन ह अपन प्रत्याशी के जीत के दावा मजबूत बताय बर कुछु करे बर तइयार रहिथे। अइसने ही 1988 के चुनाव म स्व. दिलीप सिंह जूदेव के प्रस्तावक रहे डॉ. श्रवण श्रीवानी ह ओपी चौधरी के चुनाव जीते के दावा करिन हे। अउ ये घलो कहिन के अगर अइसे नइ होइस त अपन मूछ ल मुंडवा दिही।

राज्य म विधानसभा चुनाव  के  चर्चित विधानसभा क्षेत्र मन म एक रायगढ़ जिला के खरसिया विधानसभा हो।  खरसिया ले कांग्रेस अउ  भाजपा के दू कद्दावर प्रत्याशी चुनाइ मइदान म हे।  एक तरफ युवा कांग्रेस के पदेस अध्यक्ष उमेश पटेल अउ दूसर तरफ भाजपा के ओर ले कलेक्टर के नउकरी छोड़ के राजनीति के दामन थामइया  युवा ओपी चौधरी हे।

खास बात ए  हे के  दूनों ही युवा हे, हम उम्र हे अउ  दूनों के अपन-अपन व्यक्तित्व हे अउ दूनों  झन खरसिया के लइका हे।  मगर  ए बार चुनावी महासंग्राम म आमना-सामना करत हे।  जेखर चलत विधानसभा ह सबले जादा हॉट सीट माने जात हे।  कांग्रेस के गढ़  खरसिया विधानसभा क्षेत्र म पहिली बार भाजपा कांग्रेस ल कांटे के टक्कर देवत नजर आवत हे।  पहिली ए सीट म जिहां कांग्रेस एक तरफा जीतत आत रहिस हे।  अब ए हाल  हे के मामला बराबरी म आके अटक गेहे।  बहरहाल अब फइसला खरसिया के मतदाता कर चुके हे,  जे 11 दिसंबर के आघू आही।  इही बीच दूनों ही पार्टी के नेता- कार्यकर्ता  मन अपन अपन कोती ले जीत के दावा करत हे।

फिलहाल अभु जे मामला चरचा करत  हन वो खरसिया पूर्व पार्षद डॉ श्रवण श्रीवानी के।  उमन ह ए बार दावा के संग  भाजपा प्रत्यासी ओपी चौधरी के जीत के बात कहिन ।  इही आत्मविश्वास के संग उमन  उंखर जीत म अपन मूंछ मन ल दाव  म लगा दिस हे।  उमन कहिन के लोगन अउर मतदाता मन के रुझान अउ जेस प्रकार ले उमन आघू बढ़के ओपी चौधरी ल सपोर्ट करिन हे। मैं दावा के  संग कहत हव के  ए दफा  खरसिया विधानसभा के परिनाम ओपी चौधरी के पक्ष म होही।  अगर ओपी चौधरी नइ  जीतही त मैं जीवन भर  बर अपनी मूंछ मुंडवा लूहूं।