कंसोल इंडिया उपर निसाना साधिस भूपेश बघेल ह

रायपुर। राजीव भवन म आज पीसीसी अध्यक्छ भूपेश बघेल ह पत्रकार मन ले चरचा करत हुए कंसोल इंडिया की भूमिका  पर सवाल उठाइस।  पीसीसी अध्यक्छ बघेल ह बताइस के  चुनाव के गरमी अब छत्तीसगढ़ म कम होगे हे अब ये गरमी ह मध्यप्रदेश, राजस्थान अउ तेलांगना के ओर बढ़ गिस हे। ए 5 बछर म  कांग्रेस ह  जे कारय करिस हे वो ह  जनता ले छिपे नइए। उहें कांग्रेस ह संघरसपूरन लड़ाई करिस अउ ओखर बर कांग्रेस के वरिष्ठ नेतामन ह जेल गिस हे।

भूपेश बघेल ह कंसोल इंडिया के बारे म बतात हुए कहिन के छत्तीसगढ़ म 9 बछर पहिली बने कंसोल इंडिया नाम के कम्पनी  ह बड़े कारोबार खड़ा कर लिस हे। कांग्रेस ह किसान मन के करजा माफी के घोसना करिस त ए कम्पनी के ओर ले एक फरजी पत्र बनाके किसान मन अउ मतदाता मन के बीच भ्रम फइलाय के कोसिस करे गिस । हमन ये कम्पनी अउ  एखर सीईओ के खेलाफ  निरवाचन आयोग म अउ पुलिस म घलो मामला दरज करवाए हन । उहें  भाजपा ह अपन खेलाफ खबर मन ल रूकवाय बर अउ विपक्छ के खबर मन ल प्रकाशित करवाय बर  न केवल मीडिया मालिक मन ल बल्कि पत्रकार मन घलो ब्लैकमेल करिस। उहें सरकारी अधिकारी अपन प्रसासनिक काम छोड़ के  भाजपा के राजनीतिक गोटी मन ल बिछाय म लगे रहिस अउ कांग्रेस के नेता मन ल आपस लड़वाय के साजिस रचे गिस । उमन बताइस के बीबी फॉर सीएम नाम ले वाट्सअप ग्रुप बनाइस हे। जेमा कांग्रेस नेतामन के बीच मतभेद के बात चलत रहिस हे। जेखर  सिकायत पूरव महापौर किरणमयी नायक ह अन्य कांग्रेस कारयकरता मन के संग मिलके सायबर सेल म करिस हे। मतदान के पहिली  ए तरह के भ्रम फइलाय के काम कंसोल इंडिया करिस हे।