कांग्रेस करिस कर्ज माफी के वादा….उम्मीद म धान  नइ बेचत हे किसान मन

रायपुर। छत्तीसगढ़ म विधानसभा चुनाव के तहत मतदान के प्रक्रिया समाप्त हो चुके हे, लेकिन राजनीतिक दल मन के घोषणा पत्र के खासा असर देखे बर मिलत हे। कांग्रेस ह अपन घोषणा पत्र म ए स्पष्ट कर दिस हे के उंखर सरकार बन ही त 10 दिन मन  के भीतर म करजा माफ कर देय जाही।

सासकीय धान खरीदी केन्द्र मन म खरीदी के प्रक्रिया 1 नवंबर ले सुरू हो गिस हे, लेकिन  ये केन्द्र मन म किसान नइ जावत हे। काबर के किसान मन ल  इंतजार हे नवां सरकार बने के । दरअसल, विधानसभा चुनाव के बाद प्रदेश म राजनीतिक दल मन के घोषणा पत्र के खासा असर देखे बर मिलत हे।  कांग्रेस के घोषणा पत्र ले सबले फायदा किसान मन  होही। काबर के  कांग्रेस ह अपन घोषणा पत्र म दावा करे हे के अगर कांग्रेस के सरकार बनही त दस दिन के भीतर म किसान मन के करजा माफ कर देय जाही। अइसे म किसान मन ए बात के इंतजार करत हे के नवां सरकार बनय अउ  उमन धान बेचे बर पहुंचय। ये वजह ले धान खरीदी केन्द्र  मन  ह सूना नज़र आवत हे।  अइसे नइए के किसान अपन फसल बेचना नइ चाहय बल्कि चुनाव ले पहिली राजनीतिक दल मन  ह जारी करगे  घोषणा पत्र म जादा समरथन मूल्य अउ करज माफी के बात कहे हे।

रायपुरा के किसान ओंकार साहू कहिथे के  धान खरीदी केन्द्र मन तक केवल  इक्का-दुक्का किसान पहुंचत हे,  इमन ल तुरंत पइसा के जरूरत हे।  काबर के ये किसान मन ह कोनो साहूकार या बाजार ले करजा लेय हव।  किसान दयानंद पटेल के कहिना हे अधिकतर धान खरीदी केन्द्र मन म सिरिफ छोटे किसान मन ह धान बेचत हे। रायपुर के धान खरीदी केन्द्र के प्रबंधक मदनलाल पटेल के कहिना हे के हर बछर  ये बेरा म धान के अच्छा खरीदी हो जात रहिस हे, लेकिन  ए बार पाछू बेरा के मुकाबला आधा धान ही खरीदी केन्द्र मन तक पहुंचे हे।

किसान नेता रुपन चन्द्राकर बताथे ते  वरतमान प्रक्रिया के तहत यदि कोनो किसान ह सोसायटी ले करज लेय हे त धान बेचे के बाद  पहिली करजा के  वसूली करे जात हे, फेर बचे पइसी के  भुगतान होवत हे। एखर चलत  ज्यादातर किसान मन नवां सरकार बने के इंतजार करत हे। हालांकि कांग्रेस ह अपन घोषणा पत्र म साफ करिस हे के  सरकार बने म उमन उन किसान मन के घलो करजा ल माफ कर रासि लउटाही, जेमन ये बछर धान के फसल सोसायटी म देय हे।

वादा मन उपर भरोसा…..कांग्रेस ह अपन घोषणा पत्र म ए स्पष्ट कर दिस हे के उंखर सरकार आय के 10 दिन के भीतर करजा माफ कर देय जाही। कांग्रेस प्रवक्ता घनश्याम राजू तिवारी के कहिना हे के कांग्रेस के वादा मन उपर किसान मन ह भरोसा जताय हे, येखर सेती उमन केन्द्र मन तक नइ पहुंचत हे। अउ 11 दिसंबर के इंतजार करत हे।  येती  बीजेपी प्रवक्ता सच्चिदानंद उपासने के कहिना हे के किसानमन उपर कांग्रेस के घोषणा पत्र के कोनो असर नइ पड़िस हे।