कांग्रेस म जिलाध्यक्ष बर कछु नवा तव कछु पुराना चेहरा ल कमान

0 महासमुंद, सुकमा, धमतरी, बेमेतरा, रायपुर ग्रामीण म होही रिपीट
0 पीसीसी महासचिव अउ सचिव म जुड़ सकत हे कछु नाम
रायपुर। छत्तीसगढ़ म भाजपा ले सत्ता छिने ले बेकरार कांग्रेस के शीर्ष नेता मन म कई मामला म सहमति नई बन पाए हे। पीछू एक बरस ले पीसीसी म जिलाध्यक्ष, महासचिव और सचिव के नाम ले लेकर मशक्त चलत हे। अब जाके संभावना जताए जात हे कि संगठन म फंसे पेंच थोडकन बखत म सुलझ जाही। चुनावी बरस म संगठन ल मजबूती देए बर हो सकत हे कि जल्द ही नवा नाम म सहमति बनही अउ संगठन म नवा चेहरा नजर आही तव कछु पुराना चेहरा मन म भरोसा जताए जाही।
पीसीसी म जिलाध्यक्ष, महासचिव अउ सचिव के नाम ल लेके एक साल ले मचे माथापच्ची सुलझते नजर आत हे। काबर कि चुनावी वर्ष म संगठन ल मजबूती देए बर हो सकत हे कि नेता मन समझौता करे म भलाई ल समझसी हे। जिलाध्यक्ष बर कछु नवा नाम म सहमति बने हे एती कछु पुराना चेहरा ल बने रहे के बात कहे जात हे। संगठन ले जुड़े सूत्र नम के कहिना हे कि जिलाध्यक्ष, महासचिव अउ सचिव के नाम ल लेकर फंसे पेंच जल्दी ही सुलझ जाही। सभी नेता मन के माने के बाद सूची ल अंतिम रुप दे गेहे। सबले ज्यादा नाम तय करे म मुश्किल रायपुर, दुर्ग, राजनांदगांव अउ बिलासपुर ल लेकर होवत हे प्रदेश प्रभारी पीएल पुनिया एक दिन पहिली दिल्ली बर रवाना होगे हे। ओती प्रदेशाध्यक्ष भूपेश बघेल घलो दिल्ली गे हे। ऐखर सेती कयास लगाए जात हे कि सूची आज-कल म फाइनल हो जाही। जिलाध्यक्ष ल लेके काफी ऊहोपोह के स्थिति हवय। सब्बों बड़े नेता अपन हिसाब ले नाम चाहत हे। जेखरे वजह ले कोनो एक नाम म मुहर नइ लगिस हे। जे नाम ल तय माने जाथे ओ मन म सामिल हे
रायपुर ले गिरिश दुबे, अंबिकापुर ले बालकृष्ण पाठक , कोरिया ले नजीर अहमद , जांजगीर दिनेश शर्मा ,गरियाबंद बाबूलाल साहू , बिलासपुर ग्रामीण विजय केसरवानी, कोरबा उषा तिवारी, राजनांदगांव नवाज खान, कांकेर भुवनेश्वर नागराज।