रायपुर। प्रदेस म कांग्रेस के सरकार बनेही या नइ ये अलग मुद्दा हे। लेकिन पीसीसी अध्यक्ष भूपेश बघेल के ट्वीट लोगन म चर्चा के बेषय बन गेहे। लोगन के कहिना के सत्ता म आए नइ अउ कांग्रेस पलटी मारे लगिस। जबके कांग्रेस ह अपन घोषना पत्र म कहे रहिस हे के कांग्रेस के सरकार बने म धान के खरीद के न्यूनतम दर – 2500 रुपए प्रति क्विंटल होही। लेकिन भूपेश ह ट्वीट म कोनो मेर भी समर्थन मूल्य म वृद्धि के बात नइ करिस हे।
अब सवाल ये हे के का किसान मन के धान के खरीदी बढ़े समर्थन मूल्य म खरीदी होही या फेर ये महज चुनावी घोषना बनके रह जाही। दरअसल कांग्रेस ह सत्ता पाय बर किसान मन ल सीढ़ी के तरह इस्तेमाल करिस हे। अउ किसान मन के करजा माफी अउ बढ़े समर्थन मूल्य म धान खरीदी के बात करिन। जेखर किसान मन व्यापक असर घलो होइस। अउ कांग्रेस ल 15 साल बाद फेर सत्ता पाय के उम्मीद जागिस। लेकिन सरकार बने के पहिली अब केवल करजा के माफी के बात करत हे, लेकिन समर्थन मूल्य म खामोस होगे हे।
कांग्रेस ह घोषना पत्र के जरिए किसान मन उपर ए कदर डोरे डालिस हे के जादा समर्थन मूल्य के इंतजार म किसान मन ह अपन धान ल नवां सरकार बने तक बेचे बंद कर दिस हे । प्रदेस म कतको जगह मन म ले अइसे खबर मन आइस हे, जिहां किसान धान खरीदी केंद्र मन धान बहुत कम पहुंचत हे। कतको जगा त किसान मन ह खुलके 11 दिसंबर यानी विधानसभा नतीजा मन के इंतजार के बात कहीस हे।
येमा कांग्रेस प्रदेश अध्यक्ष भूपेश बघेल ह एक ट्वीट करिस हे। बघेल ह ट्वीट म कहिन के छत्तीसगढ़ के सबो किसान मन ले अपील हे के उमन बिना डर के अपन धान बेचय अउ दूसर फसल के तइयारी म जुट जाय। कांग्रेस पार्टी ह अपन वादा अनुसार सरकार बनत ही दस दिन मन के भीतर किसान मन के करजा माफ करही। कांग्रेस जे कहिथे , वो करथे।
बघेल के ट्वीट ल ध्यान देंवव त एमा कोनो जगा भी समर्थन मूल्य म वृद्धि के बात नइ होय हे। जबके अपन घोषना पत्र म कांग्रेस ह येला जोर देय रहिस हे। कांग्रेस ह अपन घोषना पत्र म कहिन के कांग्रेस के सरकार बने म धान के खरीद के न्यूनतम दर – 2500 रुपए प्रति क्विंटल होही। संगे-संग किसान मन के करजा 10 दिन मन म माफ करे के घलोक बात करिस हे। करजा माफी के बात ल त बघेल ह अपन ट्वीट म दोहराय रहिस हे, लेकिन जे वादा मन लेके मतगणना के इंतजार करत हे किसान मन ह वो वादा म बघेल ह कुछु नइ कहिन हे।
कांग्रेस ह सत्ता पाय बर किसान मन के सहारा लिस……भाजपा के प्रवक्ता संजय श्रीवास्तव के कहिना के कांग्रेस ह सत्ता पाय बर किसान मन के सहारा लिस। अब मुकरत हे। इही कांग्रेस के असली चेहरा हव. ओखर कहे अउ करे म फरक हे। भाजपा ह 15 बछर ले किसान मन के धान खरीदत हे। एखर संग 300 के बोनस घलो दिस हे। तीन फीसदी ब्याज म करजा देवत हे। कांग्रेस के बेरा म 12 फीसदी ब्याज किसान मन ल दे बर पड़य।
