कार्यकर्ता मन मना ही डॉ रमन सिंह ह…..करही प्रदेस के दउरा

रायपुर। छत्तीसगढ़ के पूर्व मुख्यमंत्री डॉ. रमन सिंह एक बार फेर विकास यात्रा अउ अटल विकास यात्रा के तर्ज म पूरा प्रदेस के  यात्रा करही।  डॉ. सिंह विकास यात्रा के तरह ही बस्तर ले ही एखर सुरुआत करही।  ए अउ  बात हे केएखर स्वरूप एक दउरा के तरह होही।

बीजेपी ह डॉ. रमन सिंह ल ही पार्टी के चेहरा बनाके छत्तीसगढ़ म चउथी पारी  बर  दांव लगाय रहिस हे।  ए अउ  बात हे के  चउथा बेर डॉ. रमन सिंह के जादू नइ चलिस अउ पार्टी 15 सीट म  सिमट गे।  बड़े बात ए हे के बस्तर म त केवल एक सीट जीतिस अउ सरगुजा म बीजेपी ह पूरा 14 सीट गंवा दीस।  मइदानी इलाका म घलो  पार्टी के हाथ हतासा ही आइस।

अब डॉ. रमन सिंह आत्ममंथन करना चाहत हे ।  संग ही हार के समीक्षा करना चाहत हे। ए वजह हे के उमन पूरा प्रदेस म  विकास यात्रा के तरह यात्रा करही।  हालांकि ए बेर लोगन ले  नइ बल्कि संगठन के लोगन ले मिलही। बीजेपी के प्रदेस अध्यक्ष धरमलाल कौशिक दू दिन के बस्तर यात्रा म पहिली ले हे।  भाजपा प्रवक्ता गौरीशंकर श्रीवास के कहिना हे के चुनाव के समीक्षा करे बर  पूर्व सीएम डॉ. रमन सिंह प्रदेस भर के दउरा करही।

कांग्रेस के उपनेता प्रतिपक्ष रहे वरिष्ठ विधायक कवासी लखमा के कहिना हे के ए  यात्रा ले अब कुछउ नइ होने वाला।  उहें मुख्यमंत्री भूपेश बघेल के कहिना हेके ‌ उमन अपन काम करही हम अपन काम करबो। गउरतलब हे के  लोकसभा चुनाव आघू हवय।  डॉ. रमन सिंह क प्रदेस भर म दउरा  कार्यक्रम ल कार्यकर्ता मन के  नाराजगी दूर करे के  कवायद के रूप म घलो देखे जात हे।