रायपुर । किसान मन ह कांग्रेस ल छत्तीसगढ़ म सरकार के चाबी सउपे हे। ए बार अन्नदाता ह कांग्रेस के घोसना पत्र म करजा माफी म विश्वास कर ओला अपन कीमती वोट दे हे। अउ उमन ल पूरा भरोसा हे के ए पार्टी अपन घोसना पत्र म खरा उतरही अउ उंखर जिंदगी ल संवार ही। अब बारी कांग्रेस के हे उमन किसान मन ले करे गे वादा ल पूरा कर के किसान मन के किस्मत ल बदलय। हालांकि कांग्रेस बर ए वादा मन ल पूरा करना असंभव त नइ कठिन जरूर हे।
ए दफा छत्तीसगढ़ विधानसभा चुनाव परिनाम ह सबो झन आश्चर्यचकित कर दिस। प्रदेस म कांग्रेस के 15 साल के ’वनवास’ खत्म हो चुके हे। एखर बर जे सबले महत्वपूर्ण भूमिका किसान मन ह निभाइस हे। वोटिंग के बाद किसान मन ल मिले फीडबैक ले सरकार बनाए बर कांग्रेस पार्टी लगातार आसान्वित नजर आवत रहिन हे। पार्टी के तमाम दिग्गज नेता वोटिंग होए के बाद ले ही कहत रहिन हे के हमन प्रदेस म सरकार बनात हे । ए सबके बीच म सबले बड़े अउ खास बात ए हे के ए दफा किसान मन ही कांग्रेस ल सत्ता के स्वाद चखाइस हे अउ उंखर वनवास ल खत्म करिस हे।
घोसना पत्र म किसान मन बर कांग्रेस ह कतको वादा करे गेहे। कांग्रेस ह अपन 36 लक्ष्य के संग प्रस्तुत घोसना पत्र म सरकार बने के 10 दिन के अंदर किसान मन के करजा माफ करे के वादा करिन हे। एखर अलावा किसान मन ल दू साल के धान के बकाया बोनस के भुगतान घलो किस्त म करे के ऐलान करिन।
संगे- संग कृषि फसल मन के न्यूनतम मूल्य म खरीदी, धान के खरीदी न्यूनतम दर 2500 रुपिया प्रति क्विंटल, बिजली बिल आधा, भूमि-अधिग्रहन अधिनियम 2013 के सख्ती ले पालन करत हुए अधिग्रहित करेगे कृषि भूमि बर मुआवजा ग्रामीन क्षेत्र मन म बाजार दर ले 4 गुना प्रदान करे के वादा करे गेहे।
छत्तीसगढ़ के पहिली जल संसाधन नीति लागू करे के घलो कांग्रेस ह करिन हे। अउ एमा पेयजल अउ सिंचाई ल प्राथमिकता, लघु अउ मध्यम सिंचाई परियोजना मन म विशेस धियान देके 5 वर्षों म सिंचित क्षेत्र ल दूगुना अउ सिंचाई सुल्क ल खत्म कर पुराना बकाया रासि माफ करे के ऐलान करे गेहे ।
अतना ही नइ कांग्रेस ह अपन घोसना पत्र म करेगे वादा ल पूरा करे बर अउ किसान मन के भरोसा जीते बर गंगाजल ल हाथ म लेके कसम घलो खाइन। एमा कांग्रेस के कई दिग्गज नेता सामिल रहिन। ए दउरान उमन ह करज माफ अउ बिजली बिल हाफ के घलो लगाइन। जेमा किसान मन ह भरोसा जताइन।
Other Articles
