का छत्तीसगढ़ बर अलगे फॉर्मूला आजमाइस राहुल ह

साहू ल प्रदेश अध्यक्ष औउ महंत ल स्पीकर
रायपुर। छत्तीसगढ़ के अगला सीएम कउन? आज के सबले बड़ सवाल इही हे। मध्यप्रदेस अउ राजस्थान म त राहुल गांधी ह फइसला कर देय हे। अब छत्तीसगढ़ म सबके नजर हे। बइठक मन के दउर के बाद राहुल ह शनिवार संझा 5 बजे एक तस्वीर ट्वीट करिन, जेमा उंखर संग चार बड़ दावेदार नजर आलत हे। ये भूपेश बघेल, टीएस सिंहदेव, ताम्रध्वज साहू अउ चरणदास महंत हवय।
राहुल के फॉर्मूला
ये तस्वीर के संग कयास मन के दउर घलो सुरू होगे। का छत्तीसगढ़ बर राहुल गांधी ह बिल्कुल ही अलगे तरह के फॉर्मूला आजमानत हे। कयास लगाए जात हे के टीएस सिंहदेव अउ भूपेश बघेल ल ढाई-ढाई साल बर सीएम बनाय जा सकत हे। हालांकि अब तक अइसना कम ही देखे गे हे के एक ही पार्टी म ए तरह क फॉर्मूला आजमाय जात हे। उहें, ताम्रध्वज साहू ल प्रदेस अध्यक्ष के कमान मिल सकत हे। जबके चरणदास महंत स्पीकर बनाए जा सकत हे।
फिलहाल ये कयास हे अउ एला सच्चाई करार नइ देय जा सकय। पूरा तस्वीर रविवार के साफ होही, जब विधायक दल के बइठक म सीएम चुने जाही। हालांकि ए सिरिफ औपचारिकता होही, जे फइसला होना हे वो त हो चुके हे।
ए दू नाम म होही फइसला
सूत्र मन के मान त कोनो भी डिप्टी सीएम बने बर तइयार नइ होवत हे। अइसे म कांग्रेस ह ढाई-ढाई साल के सीएम के फॉर्मूला म विचार करे हे। मुख्यमंत्री बने के रेस म दू नाम सामिल हे। पहिली प्रदेस कांग्रेस अध्यक्ष भूपेश बघेल अउ दूसर टीएस सिंहदेव । जानकारी मिलत हे के दूनों नेता मन अउ समर्थक मन ल खुस करे बर कांग्रेस ढाई-ढाई साल के फॉर्मूला म विचार करे हे। खबर हे के ढाई साल भूपेश बघेल अउ ढाई साल टीएस सिंहदेव छत्तीसगढ़ के मुख्यमंत्री रह सकत हे।