कुरूद म बंपर वोटिंग…खरसिया दूसर नंबर म…..राजधानी पिछड़िस

विधानसभा चुनाव: दूसर चरन म 76. 34 प्रतिसत वोटिंग…2013 के मुकाबले कम पड़िस वोट

रायपुर । छत्तीसगढ़ विधानसभा चुनाव के दूसर चरन म 72 सीट मन म कल होय मतदान म कुल 76. 34 प्रतिसत मतदान होइस हे ।  येखर पहिली काली संझा जारी वोटिंग प्रतिसत म 71.93 प्रतिसत बतायगे रहिस हे। जेमा बदलाव होय के संभावाना बतात हुए मतदान प्रतिसत अउ बढ़े के बात कहे गिस।

बुधवार ल मुख्य निरवाचन पदाधिकारी सुब्रत साहू ह पत्रवारता म बताइस के प्रथम चरन के 18 सीट मन म 76.39 प्रतिशत मतदान होइस हे। दूसर चरन के 72 सीट मन म 76. 34 प्रतिलत मतदान होइस हे। ए तरह ले  दूनों चरन के मतदान म राज्य के सबो 90 सीट मन म कुल 77.40 प्रतिसत मतदान होइस हे। जबके पाछू चुनाव म मतदान 77.42 प्रतिशत होय रहिस हे ।  ये बेर सबले जादा मतदान कुरूद म 88.99 प्रतिसत होइस हे , उहें सबले कम रायपुर उत्तर म 60.30 प्रतिसत वोटिंग होइस हे । श्री साहू  ह बताइस के छत्तीसगढ़ म दूनों चरन के मतदान शांतिपूरन रहिस हे।

उमन ह येखर बर सबो मतदाता मन , दिव्यांगजन मन, तृतीय लिंग समुदाय के मतदाता मन, निरवाचन कारय म लगे करमीमन , सुरक्छा म लगे पुलिस अउ मीडिया  ल धन्यावाद दिस हे ।  श्री साहू ह बताइस के दूसर चरन  के चुनाव म एक दंपत्ति अपन दो दिन के लइका ल लेके मतदान करे बर आइस।

ए दंपत्ति ह अपन लइका के नाम विधान रखे हे। ये नाम उमन  लोकतंत्र म अपन आस्था ल अउ मजबूत होय के दउर  म रखिस हे। संगे- संग बताइस के सतायु मतदाता मन ह बड़ी संख्या म मतदान करिन हे । जेमा महिला जादा  रहीन हे। कोरिया के हिमांशु मिश्रा पचास दिन तक कोमा म रहिस हे। उमन ह घलोक मताधिकार के परयोग करिस हे। उमन  बताइस के मतदान ल लेके मतदाता मन म विसेस उत्साह रहिस हे।