कृषि विकास के क्षेत्र म छत्तीसगढ़ ह फेर लहराइस परचम

प्रधानमंत्री मोदी ह कृषि विज्ञान केन्द्र कांकेर ल करिस सम्मानित
रायपुर । कृषि विकास के क्षेत्र म छत्तीसगढ़ ह एक बार फेर अपन श्रेष्ठता साबित करे हे। इंदिरा गांधी कृषि विश्वविद्यालय रायपुर के कृषि विज्ञान केन्द्र कांकेर ल भारत सरकार ह देश भर म संचालित 650 कृषि विज्ञान केन्द्र मन म सर्वश्रेष्ठ कृषि विज्ञान केन्द्र के रूप म सम्मानित करिस हे। भारतीय कृषि अनुसंधान संस्थान नई दिल्ली म आज आयोजित सम्मान समारोह म प्रधानमंत्री नरेन्द्र मोदी ह कृषि विज्ञान केन्द्र कांकेर ल पं. दीनदयाल उपाध्याय कृषि विज्ञान प्रोत्साहन पुरस्कार-2017 ले सम्मानित करिस हे। इंदिरा गांधी कृषि विश्वविद्यालय के कुलपति डॉ. एस.के. पाटील अउ कृषि विज्ञान केन्द्र कांकेर के समन्वयक डॉ. बीरबल साहू ह ये पुरस्कार ल प्राप्त करिस हे। पुरस्कार के रूप म अधोसंरचना विकास बर 25 लाख रूपिया के राशि अउ प्रशस्ति पत्र प्रदान करे गेहे। ये अवसर म केन्द्रीय कृषि मंत्री राधामोहन सिंह, मध्यप्रदेश के मुख्यमंत्री शिवराज सिंह, मेघालय के मुख्यमंत्री कोनार्ड संगमा, कृषि राज्य मंत्री पुरूषोत्तम रूपाला, गजेन्द्र शेखावत, कृष्णा राज अउ भारतीय कृषि अनुसंधान संस्थान के महानिदेशक डॉ. टी. मोहापात्रा घलो उपस्थित रहिस हे।
भारत सरकार ह कृषि विज्ञान केन्द्र कांकेर ल ये सम्मान पोषण वाटिका, एकीकृत कृषि प्रणाली अउ कड़कनाथ मुरगा मन के उत्पादन जइसे नवाचार मन के माध्यम ले कांकेर जइसे नक्सल प्रभावित अउ पिछड़ा जिला मन म किसान मन के स्वास्थ्य म सुधार अउ पोषण सुरक्षा उपलब्ध कराए बर दे गे गिस हे।