कोण्डागांव । महिला अपराध ल कम करे के कवायद म बस्तर के कोण्डागांव पुलिस ह एक नवा पहल करे हे। कोण्डागांव जिला पुलिस ह जगह-जगह शिकायत पेटी लगाए हे। ये कंप्लेंट बॉक्स म महिला मन ह अपन शिकायत डाल सकत हे। पुलिस ये शिकायत मन ल गंभीरता म लेके तुरंतेच कार्रवाई करही।
अक्सर देखे जात हे कि महिला मन ह कभु संकोच ले या फेर डर के वजह ले खुद उपर हुए अपराध मन के शिकायत नइ कर सकय। शिकायत नइ करय एखर सेती अपराधी मन के हसुला बुलंद हो जात हे। अउ अपराध म भी इजाफा होत जात हे। ये देखत हुए पुलिस ह गर्ल्स हॉस्टल, कॉलेज अउ बस स्टैंड जइसे सार्वजनिक जगह मन म कंप्लेंट बॉक्स लगाए हे।
ये अभियान के नोडल अधिकारी एसआई मनोरमा कुर्रे ह बताइन कि आम लोगन ले समपरक बढ़ाए के पुलिस प्रयास करत हे। कतको बार डर या संकोच ले लोगन खासकर के महिला मन पुलिस के पास नइ आवय । पुलिस कवायद करत हे कि लोगन मन के शिकायत मन के जल्द समाधान करे जाए अउ महिला अपराध मन म लगाम लगय।
