खेत म मिले सोने के सिक्का मन ल लेके एक नवा विवाद

रायपुर। बस्तर संभाग के सुकमा जिला के किन्दरवाड़ा म एक किसान के खेत म दो कलश म मिले सोने के सिक्का मन ल लेके एक नवा विवाद शुरू हो गेहे। ये विवाद म पुलिस अउ पुरातत्व विभाग उपर संदेह जताए जात हे। बताए जात हे कि कांसा के कलश म मिले एक सौ अठहत्तर सोना के सिक्का ल ग्रामीण ह पुरातत्व विभाग म जमा करवा दिस हे। लेकिन येमा ले करीब 100 सिक्का गायब हे।
नक्सल क्षेत्र म सोना के सिक्का के खुली लूट ले लेके पुलिस उपर भी संदेह के बादल मंडरात हे। जिला पुरातत्व समिति के सदस्य हेमंत कश्यप के मुताबिक बस्तर म सोना के सिक्का मिले के सिलसिला पीछू कई बरस ले जारी हवय। हाल ही म सुकमा जिला के किन्दरवाड़ा के किसान नीलम ल खेत म खुदाई के दउरान दो कलश म सोना के सिक्का मन मिले के बात सामने आइस हे।
हेमंत कश्यप के मुताबिक किसान ह दूनों कलश के सिक्का मन ल छिदंगढ़ क थाना म ले गे रिहिस हे। लेकिन उंखर बाद ये बात सामने आइस हे कि कांसा के एक कलश म ही सिक्का मिले हे। एती कांसा के दूसर कलश के सिक्का के गायब होए के बारें म कुछ स्पष्ट जानकारी सामने नइ आवत हे। कहे जात हे कि किसान ह जब पुलिस के पास दो कलश सिक्का लेो पहुंचिस हे तो पुलिस ल मामला दर्ज करे सिक्का मन ल खुद पुरातत्व विभाग ल सौपना रिहिस हे। लेकिन पुलिस ह अइसे नइ करिस।