खेलबो-जीतबो, गढ़बो, नवा छत्तीसगढ़

बघेल कका ह हमर लोक खेल के बढ़ा दिन मान, छत्तीसगढ़िया बनही सिरमौर

छत्तीसगढ़िया ओलंपिक ह ए दरी जम्मो राज म सुरू हो गे हे। तिहार के खुसनुमा बेरा म का नोनी का बाबू अऊ का सियान जम्मो ए खेल म हिस्सा लेवत हे। एक कोती जिहां धरती माता के हरियाली जम्मो छत्तीसगढ़ ल ओढ़ना कस ओढ़ ले हे उहें फसल घलो खेत म लहलवाहत हे। पेर ए खुसहाली के बीच पहिली दरी होवईया छत्तीसगढ़िया ओलंपिक म लोगन मन के खुसी के ठिकाना नई हे। लोगन मन खेल ल देखके अपन माटी के याद करत हे जिहां कभू खेले रिहिन।

हमर संस्कृति म ए परंपरागत खेल ह सिरिफ मनोरंजन के जरिया नोहे संगे-संग अपन सरीर ल स्वस्थ्य रखे के जरिया घलो हे। पिट्टुल, गिल्ली -डंडा, खो-खो, कबडडी जईसे खेल ह इहां गांव-गांव म खेले जाथे। उहें खो-खो अऊ कबड्डी के खेल म खिलाड़ी मन के चुस्ती अऊ फुरती ह देखत बनथे। उहें नोनी अऊ माईलोगिन मन म फुगड़ी के खेल ह अब्बड़ लोकप्रिय हे।

छत्तीसगढ़िया ओलंपिक म ओ खेल मन ल सामिल करे गे हे जेन ह इहां के माटी ले जुड़े खेल हरे अऊ पुरखौती ले लोगन मन ए खेल ल खेलत आवत हे। फेर कुछ बेरा ले ए खेल मन ह लुप्त होवत रिहिस फेर ए खेल मन ल नवा पहिचान दिलाए बर हमर राज के मुखिया भूपेश बघेल ह पहल करिन। एखर स्वरूप ल बड़का रूप दे बर खेल प्रतियोगिता के रूप रेखा तियार करे गिन। कैबिनेट के मंजूरी दिलाए के संगे-संग ए खेल के आयोजन बर मंजूरी दे दे गिस। अभी होवत आयोजन म कुल मिलाके हमर माटी के 14 परंपरागत खेल मन ल सामिल करे गे हे।

तीन महीना याने कि 6 अक्टूबर ले 6 जनवरी 2023 तक चलईया ए छत्तीसगढ़िया ओलंपिक म गांव ले लेके सहर तक जम्मो जगह खेलमय के नजारा दिखत हे उहें आगू घलो माहोल अइसने रहे के उमीद हे। परम्परागत खेल मन के ए आयोजन ले इहां के खेल अऊ संस्कृति घलो विकसित होही। आयोजन ले जिहां खेल ल लेके लोगन मन के जागरूकता बढ़ही उहें नवा नवा प्रतिभा मन ल आगू आए के अवसर घलो मिलही।

छत्तीसगढ़ म खेल ल बढ़ावा देबर इहां खेलबो-जीतबो गढ़बो नवा छत्तीसगढ़ के नारा घलो दे गे हे। उहें अब देखत देखत छत्तीसगढ़ ह खेल क्रांति कोती घलो बढ़त हे। अवईया बेरा म एखर असर ह जरूर देखे बर मिलही। बात करबो इहां के खेल उपलब्धि के त हमर माटी ल नवा पहिचान मिले के सुरुआत हो गे हे। गुजरात म चलईया 36 वां नेसनल गेम म आकर्षी कश्यप ह गोल्ड मेडल जीत के इहां बेडमिंटन खिलाड़ी मन ल नवा पहिचान दिलाईस त इही राष्ट्रीय खेल में पहला गोल्ड मैडल स्केटिंग स्पर्धा म अमितेष मिश्रा ह जीत दिलाके छत्तीसगढ़ महतारी के छाती ल गरब दिला दिस। छत्तीसगढ़ के खिलाड़ी मन ह अब तक 7 मेडल जीत ले हे। जेमा दू गोल्ड अऊ तीन सिल्वर के संगे संग एक कांस्य सामिल हे।