‘भारत के लोकतंत्र के ताकत ल छत्तीसगढ़ के बस्तर के जंगल मन म रहइया आदिवासी मन ह सिद्ध कर दिस’

। छत्तीसगढ़ विधानसभा चुनाव म दूसर चरन बर होवइया मतदान बर प्रचार-प्रसार करे खातिर अंबिकापुर पहुंचे प्रधानमंत्री नरेंद्र मोदी ह राहुल अउ सोनिया गांधी के संगे-संग नेता प्रतिपक्छ टीएस सिंहदेव उपर निसाना साधत हुये कहिन के राज दरबारी मन ल एक ही परिवार के गीत गाय के सउक लग गेहे। अइसे लोगन मन ह अंबिकापुर के लोगन ल ही चोट पहुंचा सकत हे।
आज भारत के प्रधानमंत्री नरेंद्र मोदी ह अम्बिकापुर के पीजी कॉलेज ग्राउंड म विसाल आमसभा ल संबोधित करिस। ये सभा म मोदी ह कांग्रेस उपर जमके निसाना साधिस अउ कांग्रेस पारटी उपर गंभीर आरोप घलो लगाइस। प्रधानमंत्री नरेंद्र मोदी ह लोकसभा चुनाई के दउरान अंबिकापुर म होय सभा के जिकर करत हुये कहिन के पाछु बार आपन लालकिला बनाय, जेला देख के दिल्ली वाला मन के नींद हराम हो गेहे। लाल किला ले मोदी बोलय अइसे कल्पना कइसे कर दीस। ये त एक ही परिवार के अधिकार हे, ये अंबिकापुर वाला मन कइसे कर दीस, उंखर गुस्सा अभु तक नइ उतरे ह आपमन के उ पर ले। उमन सभा म मवजूद लोगन ले कहिन के अइसे लोगन ल सजा देय के मउवका आय हे। अंबिकापुर म आयोजित सभा के पहिली छत्तीसगढ़ के पारपंरिक वाद्ययंत्र मांदर थपथपाय गिस। वाद्ययंत्र मन ले दिलचस्पी रखइया नरेंद्र मोदी ह मांदर म थाप घलो लगाइस। आयोजन के दउरान मवजूद लोगन मन ह करतल ध्वनि कर ये पहल के सराहना करिन।
प्रधानमंत्री मोदी ह कहिन के छत्तीसगढ़ म एक झन भी कांग्रेसी ल जीतन मत दव। मोदी ह ये सभा म अंबिकापुर ले भाजपा के प्रत्यासी अनुराग सिंहदेव ल अनुराग भाई कहिके संबोधित करिस। मोदी के सभा म सांसद समेत अविभाजित सरगुजा क आठों विधानसभा सीटमन के भाजपा प्रत्यासी मवजूद रहिन हे। मोदी ह बतास के कांग्रेस कहथे के वोट दोगे त कृपा होही। जनता के 4 पीढ़ी मन उपर उमन राज करिन, उमन ल जनता ह परखे हे। उमन ले हिसाब लेना चाही अउ उमन ल जवाब देना चाही। मोदी ह कहिन के हम त हर रोज 4 बछर ले हिसाब देवत हन, उमन काबर नइ देवत हे।
उंगली काट देय के चुनवती देवइया मन ल जनता ह दिस जवाब …….. सभा के दउरान विधानसभा चुनाइ के प्रथम चरन म होय भारी मतदान के जिक्र करत हुये मोदी ह कहिन के डरे बिना, झुके बिना मतदान कर भारत के लोकतंत्र के ताकत ल छत्तीसगढ़ के बस्तर के जंगल मन म रहइया आदिवासी मन ह सिद्ध कर दिस। जनता के अधिकार मन जे काम ल सुरक्छा बल मन के बंदूक नइ कर सकत हे, वो काम बस्तर क जनता ह वोटिंग मशीन के बटन दबाके कर दिखाइस। चुनवती देय रहिस हे के चुनाइ के बाद जेखर उंगली म काला निसान होही, ओखर उंगली मन ल काट देय जाही। उंगली काट देय के चुनवती देवइया मन ल जनता ह जे जवाब दिस हे , वो ह दूसर चरन म अउ लोगन मन बर प्रेरना हे ।
अटल जी ह छत्तीसगढ़ के सपन मन ल पूरा करिस…… मोदी ह कहिन के नागरिक मन बर सरकार चुनइ एक ही मापदंड होथे, आपमन ल ये देखना चाही के सरकार लोगन अउ सहर के बीच म भेद त नइ करत हे। भाजपा पार्टी ही अइसे हे जे बिना भेदभाव के काम करत हे। कोनो भी प्रकार के भेद भाव नइ करत हवय। भाजपा के एक ही नारा के संग चलत हे।सबके संग सबके विकास ये ही बीजेपी के नारा हे। मोदी ह कहिन के छत्तीसगढ़ ल अटल जी ह बनाइस हे। अटल जी ह छत्तीसगढ़ के सपना ल पूरा करिस हे। अब आप मन राज्य म अटल जी अउ भाजपा के सपना ल पूरा करे बर कमल म बटन दबाके भाजपा ल जीताना हे।