छत्तीसगढ़ सरकार के नवां कैलेण्डर के ए हे खासियत

सात दसक के  गउरवसाली यात्रा के ऐतिहासिक तस्वीर मन ले सुसज्जित हे

रायपुर। मुख्यमंत्री भूपेश बघेल के कार्यकाल के प्रथम माह म प्रकासित बरस 2019 के सासकीय कलेण्डर ह लीक ले हट के हवय। एखर  सबले बड़े विसेसता हे के  ए सन् 1930, 1933, 1936, 1939 के ऐतिहासिक तस्वीर मन ले  सुसज्जित हवय, जे देस के गउरवशाली अतीत ले छत्तीसगढ़ के चेतना के तार ल जोड़त हवय।

ए दउर के महान नेता मन  के  याद के महक अउ भारतीय स्वतंत्रता संग्राम म योगदान देवइय छत्तीसगढ़ को महान विभूति मन के स्मृति ल ए कलेण्डर म संजोए गेहे। ए  कलेण्डर राजस्व विभाग के सासकीय मुद्रणालय ले प्रकासित  करे गेहे।

मुख्यमंत्री बघेल ह काली  विधानसभा परिसर म ए सचित्र कलेण्डर के विमोचन करिस हे।  सासकीय कलेण्डर म ए घलो दरसाय गेहे के विगत 7 दसक म भारत कइसे  गढ़े गे हे अउ नवां सरकार के सोच के अनुसार कइसे धरोहर अउ परम्परा मन के सम्मान करत हुए छत्तीसगढ़ गढ़े जाही।  पुरखौती, अइसे गढ़य देस के शीर्षकों के संग, मुख्यमंत्री भूपेश बघेल के तस्वीर के संग छत्तीसगढ़ी म ए नारा हे – ‘गढ़बो नवा छत्तीसगढ़‘।

छत्तीसगढ़ राज्य गठन सन् 2000 ले लेके अब तक कभु घलो सासकीय कलेण्डर म इन विभूति मन अउ प्रसंग ल  स्थान नइ मिले रहिस।  मुख्यमंत्री भूपेश बघेल के दिसा-निरदेस म ए बरस के  कलेण्डर तइयार करे गेहे। नवां बरस ए कलेण्डर म राष्ट्रपिता महात्मा गांधी के छत्तीसगढ़ प्रवास के विभिन्न प्रसंग मन म एक सन् 1933 के तस्वीर हवय, जेमा विद्या मंदिर योजना  म रायपुर के प्रथम विद्या मंदिर के शिलान्यास करत हुए महात्मा गांधी हे। कलेण्डर म अइसन अनेक ऐतिहासिक तस्वीर मन के समावेश हे।

कलेण्डर के विमोचन कार्यक्रम म राजस्व एवं आपदा प्रबंधन मंत्री जयसिंह अग्रवाल, वन, आवास अउ पर्यावरण मंत्री मोहम्मद अकबर, विधायक कुलदीप जुनेजा, मुख्यमंत्री के मीडिया सलाहकार रूचिर गर्ग, संसदीय सलाहकार राजेश तिवारी अउ स्कूल शिक्षा तथा जनसम्पर्क विभाग के सचिव गौरव द्विवेदी समेत अनेक वरिष्ठ अधिकारी उपस्थित रहिन हे।