जइया मिर्ची म शोध बर छत्तीसगढ़ के किसान ल मिलिस राष्ट्रीय सम्मान, सीएम ले किसान ह शोध ल आगे बढ़ाए बर मांगिस मदद
जय जोहार रायपुर… मुख्यमंत्री भूपेश बघेल ह राष्ट्रीय नवाचार किसान सम्मान ले नवाजे गे रामलाल लहरे ल कृषि के क्षेत्र म योगदान बर बधाई दिस अऊ ओखर उज्जवल भविष्य के कामना करिस। रामलाल बलरामपुर जिला के वाड्रफनगर विकासखंड के ग्राम महुली के रहवइया हे।
गौरतलब हे कि रामलाल ल ए सम्मान भारतीय कृषि अनुसंधान संस्थान के तरफ ले दुर्लभ अऊ सबले तीखी प्रजाति के जइया मिर्ची के संरक्षण अऊ संवर्धन बर 3 मार्च के राष्ट्रीय विज्ञान मेला दिल्ली म केंद्रीय कृषि राज्यमंत्री कैलाश चौधरी ह प्रदान करे रहिस।
मुख्यमंत्री भूपेश बघेल ले मुलाकात म रामलाल ह अपन शोध के बारे म बताइस अऊ शोध कार्य ल आगे बढ़ाए बर सीएम ले सहायता दिलाए के आग्रह करिस। वो हा बताइस कि सरगुजा अऊ बलरामपुर के पहाड़ी क्षेत्र मन म मिले वाला दुर्लभ मिर्ची म 20 प्रतिशत कैप्सेसिन यौगिक पाए जात हे, जेन कोलेस्ट्राल ल कम करे म सहायक होत हे।
